Tarutsü nung matamabensartem junga alitsü asoshi inyaktsüla

Prof. Buno Liegise-i tanü Bodbar nü NU Kohima nung matamabensartem indang teinyaktsütem shisadanga jembiba noksa ka yangi angur.  October 5, 2016.

Kohima, Oct 5 (TYO): Shilem agitsü purtem ajaki tarutsü anogotem nung matamabensartem tia tajungba asütsüsa külemi longjemer inyaktsüla ta Nagaland University nung School of Humanities & Education Dean aser Campus In-Charge Prof. Buno Liegise-i metetdaktsü.
Tanü Bodbar nü Nagaland University, Kohima Campus, Meriema nung Ali Yavar National Institute for Speech and Hearing Disabilities (AYJNISHD), Mumbai ajanga matamabensartem yaritsü asoshi tangazükba agütsüba training sentong ka ayongzüka akaba sentong nung jembidang Prof. Buno-i iba o ya metetdaktsü.
Iba sentong nung jembidang laisa ashiba agi, Naga nunger loktiliba nung matamabensartem ya meima repranger aser anepalur. Aji oda, akhi tetsü tebou mapang nungi Naga nungertemi matamabensartem mezüngmeshi masür, anungji item ama tanurtem mezüngmeshia amshibaji Naga nungertemi magizüktetter ta Naga nunger sobaliba tajung ka laisa metetdaktsü.
Ajisüaka, tsüraburtemi item ama tangar memenepba tanurtemji onsara tali meimer asünungji kechalenia moudaktsüi anepalur, ajisüaka iba jagi tanurtemji dang timatemer. Tsüraburtem aikati aakba agi mesüra mesademtsü asüba agi pei chirnur matamabensartem lokti sendeni anir maor, ajisüaka iba jagi tanurtem mulung yirudaktsür aser iba jagi parnok aika taküm akoksadaktsür ta laisa metetdaktsü.
Tamalenbo kaketreju nunga matamabensartem azüngtsü asoshi kecha balaka anepalu mesüi liasü saka tangbo center government nungi SSA, RMSA aser Right to Education sentongtem ajanga item nüngdak ajakji ayimjema reprangdagi ta laisa metetdaktsü.
Iba ama sentong takok ngua inyaka aotsü asoshi State Coordination Committee for Disabilities tashi itshitsüla aser Nagaland University-ia item maparen nung tangatetba agüja school nung sayutsü kaket tashi adoka agütsütsüla ta laisa ashi.
Ano, kaketrejutem nung B.Ed, M.ED aser MA Education nung sayuba den külemi ano University nunga “Department of Disabilities Studies” balaka ali nung kanga jungla ta laisa shisem.
Prof. Buno-isa nisung shiai timtem terabo agia item tanurtem asoshi langkabosa inyaktsütsüla ta metetdaktsü. Laisa ashiba agi, Nagaland Univeristy nung MA 4th semester nungbo matamabensartem indang agir.
Iba kasa sentong nung School of Social Sciences nung Dean, Prof. N. Venuh-ia shilem agia jembidang, tang tashi Naga nunger loktiliba nung matamabensartem temeten indang junga memetet, anungji iba ama temeten aser teinyaktsütemji nübortem dang sayutsüla ta metetdaktsü.
Iba sentong lapoka onük nung AYJNISHD-ERC Kolkata nung Faculty, Indranil Chatterjeei jembi aser Women Studies Centre, NU nung Director, Dr. Rosemary Dzuvichu menden liasü.
Iba sentong nung tesayutem mongin aikati shilem agia matamabensartem anepalutsüba aser parnok jenjang tajungba ka küma aotsü asoshi telemtetba kar agiogo.