Tasanger mali nungbo !

Tangobo mangotsüa akok saka ki anüker azüi tangar aruya aliba ngur asangba agi aiben ki kibur lendong nungi kümzüker. Iba amaji telong tashi ia mebushitettsüa akok mesüra temerenshia magütsütettsüa akok saka nisung ka anati mesüra mulungtet telok kari goverment-i inyakba mapatem mita bushisüngdangba ajanga nübortem ajangzüker aser alima renloker. Nübortemibo memetettsüa akok saka Nagaland nunga nübortem metetsümonga makoksadaktsünüba agi nüngsen agia aser lendong ataloka majem nisung kari bendanga agüja inyakba angur. Item rongnungji Against Corruption and Unabated Taxation (ACAUT), Public Service Aspirants of Nagaland (PSAN), Peoples’ Democratic Right aser Human Rights Law Network teloktem nung senso tajung aikati nübortem  asoshi nübo aser rongsen lalua inyakba dang masü saka lendong timtem aser nüngsen ajak tizükteta inyakdagi. Item telok yagi asangba (ola adokba) ajanga government nung inyakertemi akok tashi ochitashiba, teindangba aser tajungba inyaktsü merangba angur. Atangji, government inyakyim nung dang masü saka gari totzü ayokba tashi nung nübortem ashiokja aliba item ama telok ajanga puteta nübortem ajangzükdaktsüba asenoki metetogo. Item teloktem yagi nübortem timtemdakja tashiyim agi sen saruba, government mapa nung tatidang magii tejak repranga mashilen nungi aniokba aser state government kübok deparment balala nung nübortem akoksatsüsa tim masüba mapa inyakbatem anema ola adoker.Iba jagi tang tashi nunga nübortem aika ajangzükogo. Alima asünungji ochishia linüyonga aikati makoker aser indang-indanga inyaknüyonga tetsükdaktsü aika ajurur. Iba ama tatidang nung jagi nisungtem kümzüktsü asoshi teyarir nüngdaker. Tanü ama tensa nung teyarirtemji ochimashi mapa meinyakdaktsütsü asoshi nokdangertemji asütsü. Parnok jagi ola adokba agi, tim masüba mapatem inyaktsü mesadem kümdaktsür aser miima meinyaktetter. Tanü koba lima nung südir süaka, government inyakyim nung ochishia otetbaji inyakertem kijai ochishia inyaknüba agi masü saka ochishia inyakdaktsütsü asoshi tanen maka ola adoka asanga anidaker aliba agi otetter. Atangji, ochimashi agi karbo kanga ajangzüker aser item kar rongnungji asena densema alitsüa akok, iba jagi ochimashi mapa anema ola adokertem tasü itdakja menungiter südi, Ajisüaka, ochimashi mapa agi nübortem takoksa anguba nung asenok ajak dena lir. Ochimashiba agi lenmang meyangluba nung asenok ajak kasasa timatemer, ochimashiba agi mozü ki shitak meyutetba aser school junga anepalu masüba agi asenok ajak kasasa akoksar. Iba amaji ochimashiba agi light junga maruba nung asenok ajak akoksar. Aji oda, ochimashiba agi, tzü mopng menendaktsüba agi asenok ajak kasasa shirangdaktsür. Tanübo asenok dak mekongshir amai asütsüa akok saka asüngbo ochimashiba agi asen chirnutem mapa mangutsü. Alima nung asen kija makoksai jangratema alitsüba tesembo kecha maka. Iba tangatetba nung asen kija ajungtsü bilema masü saka alima ajak ajungtsü bilema asen alidak aser asen mapa inyakdak aseni akok tashi mapa tilaka nung asüyonga jungjunga ochishia inyaktsüla. Asenok aikati asenbo nüngsen kecha magii ajemajema alitsü saka asenok asoshi tangar kari nüngsen agia ochimashi anema inyaktsüla ta bilemer. Iba jagi asenok aika tangar nüngsen jembir dang akümer. Aseni ngua aser meteta ochimashi mapa inyaker aser item jagi asenoka akoksar, saka itemji anema aseni masü ACAUT, PSAN, PDR aser Human Rights teloktemi nokdaktsüla ta asenoki asadener. Tetezü ochimashi mapa anema nokdaktsübaji asen mapa masü parnok mapa. Asen lima tajungba küma melenshidaktsünüra iba tangatetbaji endoktsüla. Pi nem dang nüngsen agidaktsütsü matai asenia agitsüla. Asenoka o dang jembia makazüi ayazüka oa tim masüba mapatem metongshija jajatsüla. Ashiko, tanübo asenok tebok sünga aliba agi ola madoker asütsüa akok, saka asen taküm aser chirnur tarutsü tiaji tanü asen tebok sünga aliba kija agi meyanglutettsü.