Tasembuba Kohima District Volleyball asayamung tenzükogo

Kohima, October 24 (TYO): Parliamentary secretary for youth resources & sports, state lotteries, chairman Music Task Force aser Kohima DPDB chairman, Khriehu Liezietsu-i, saisapong nung sempet alir lanurtem anitena tali tajungba kümdaktsütsü asoshi training agüja sabang tajung nung shilem agidaktsüba ajanga mongin kümer national aser international level nung asayatettsüsa anitettsüla, ta Honibarnü Kohima District Volleyball Tournament tasembuba lapoktsüba mapang ashi.
Pai, “Asayamung aika ayonga akatsü nüngdaker, ajisüaka asayamung ayongtsü asoshi nübu aser rongsen jenti nüngdaker,” ta Kohima District Volleyball Association (KDVA)-i ayongba asayamung lapok nü Kohima Local Ground nung ashi.
Aji oda süaka, item tebilemtsütemji takoktsü kechiba süra tanü asüngbo asayamung akadang sentong sasep nung tetenlar jenti lir aser ‘corporate’ balala nungi teyari jenti ngutettsü lenmangtem peria lir, ta pai shisem.
Pai, asenok ajaki telephone amshir aser ibaji ajanga telecom company tem ajangzüker anungji asenoki dang teyari meshira parnokia iba amala asayamung nung yaritsüla ta angateta tenlatsü, ta ashi.
Volleyball asaya tsütsü jembidang pai, “Naga nungerji kanga teyakyak aser saisapong meimertem lir. Asenoki tapu ajak melamela angazüker. Yimtsüngtem nung moapu tulu mali anungji moapu tila nung volleyball ang asayateter aser ibaji ajanga iba asaya nung yimtak yimtsüng nungi asayar tajung timba adoker, ta ashi.
Asayamung tenzükba mapang KDVA Tir Visasielie Suohu-i, iba asayamung nung telok 26-i shilem agitsü, (tebur telok 18/tetsür telok 8) aser October 26 nü tembangtsü, ta metetdakja liasü.