Tasembuba RES art competition 2016 takok ngua agiogo

Kohima, June 25 (TYO) : Radiant Educational Society (RES), Kohima-i tasembuba RES Art Competition 2016, tanü Honibarnü SIRD Auditorium nung “Tanur ka temetenji nu menden nungi tenzüker” omen nung ajemadaker kanga takok ngua ayonga agiogo.
Iba tetoktepba nung school 14 nungi tanur 47-i shilem agia liasü.
Iba sentong nung Joint secretary social welfare & society director State Child Protection Society Nagaland, Z. Nyusietho Nyuthe tongti tesemdanger süa sentong lapoktsü.
Pai, tanur atema taküm alitsü, terenlok angutsü, kümzüka alitsü aser United Nation Convention ajanga melaba ama kechisarena nung shilem agitsü temeten lir, ta ashi. Naga nunger sobaliba nung kibongji tanur ka atema reju ajak dang tajungtiba aser tanur ka kümzüka alitsü temeten sadema lir, ta pai shisem.
Tanurji aruya-a aliba putu atema nüngdak lir anungji nenok sempet tajung ajanga asen lokti nem tesayuba tajung agüjang aser nenok pei nükjidong atongtsü atema kanga meranga inyakang, ta Nyuthe-i iba tetoktep nung shilem agirtem ajungshi.
Tanurtemi pei dak aketba sempet sayutettsüsa yamai sentong tajung ayonga katsüba atema sentong ayongertem danga kanga pelar, ta paisa metetdaktsü.
RES Kohima nung mendenbuba, Menuokhrietuo Marcus-i, tanurtem ajaki jangraba noksa yangluba tsütsü parnok dak keta aliba sempet temai adoka sayutsü nükjidong nung iba sentong ya ayong, ta ashi.
Pai, iba tetoktepba ajanga tanurtem lenmang aisü nung ajangzüktsü kechiba süra noksa yangluba ya parnok aienba mapang kanga nüngdakba mapa ka lir, ta ashi.
Iba sentong atema senotsü nung State Child Protection Society Nagaland aser RES nati yaritepa liasü.
Iba tetoktepba nung tetendangertemji noksa yanglur tejen aser directorate of art & culture, Neivotuo Keyho, noksa yanglur mongin aser directorate of art & culture, T. Yanger Ozukum aser State Child Protection Society Nagaland nung programme manager, Raitale Zeliang nunger liasü.
Mezüng jenjang nung takok angur nem senpet sen 10,000, tanabuba nem 7000, tasembuba nem 5000 aser pezübuba nem 2000 agütsü. Iba den külemi pongububa nungi terbuba tashi nema senpet sen meyirjang kaka (1000 each) agütsü.