Tasemtepba Temzüng-Ozüng (Ibri 12:1-13)

“Saka mapa ajak mera keta aser tatongi shia inyakdakjang.” (1 Kor. 14:40)
Khristan kaji tasemteper ka lir. Tenyar Pauli ashi, “Aser ano asaya nung merangbai ozüng agi merarara, pa nem korang mesemtsür” (2 Tim. 2:5). “Tatembangi tetenzükbaji metentsür”- tanü alima nung Khristan tenzükba tanela ama lir. “Nübur dang peladaktsüra aser sayutsüngir dang ajangzükra kechisarena mashi lemang nungi inyakang.” Ibai Khrista aser Pa tenyartem tesayuba den meputep.
Khristan tenzükbaji ki asüba den metemdanger. Ano kechi oset amshir iba dena metemdanger aser mi agi tendanger (1 Kor. 3:12,13; Yr. 23:29). Tesayur tasen adoker aser parnok inyakyim ajak meshitetja, “Tsüngremi kü dang ashi” ta sayutsüngir. Shirnoki ya angashir parnoki bilemloka aotsü mesüra angatettsü tsübur. Tsüngremi zülua akaba O den kodang tsüktepba/meputepi meinyaker. Asenoki sen-o-tzü bushiba yimya aser tamaba menden agütsüyim Laishibaji mamatokli.
Khristan mapa inyakertem tenzükba mapa nungi atsüngzüka aobajia tejashitsü ka lir. Atsüngzükertemji tanishir den mangatettepi majungshitsüla. Khristan tanishirtem parnok libaliro jenjang (ethical standard) junga ayutsüla. Ozüng ter nung kechi ashir bilemtettang, “Nai ne kiyonger tenükshi” “Kechi nai ne dang meinyakdaktsüner aji nai tangar dang teinyak!”
Tetentet tanishirtem aser tanga tentet nungia arua mapa shia külemi senteper Lai tesayuba nung inyakyim mapa ochi shia lemsateptsüla. Tasü ita tashishitsü aketba mapatem melenshiteptsüla. Haggai ainkari ashir, “Ne lemangtem shisadangang” (Haggai 1:5,7). Tsüngremer mapa Tsüngremer nisungi Tsüngremer lemang Tsüngremer mapang nung inyakba mapa nung Tsüngremer teyari meteni malir ta asenoki metettsüla!
Asenoki nüngdakba tasü tait bushidi
Atalokdaktsütsü temaleni ajaba-
Meimchiri temoatsüji metettsü
Tsüngremer mulungba inyakba!
(Thomas A. Jackson)