Tasen Kümshiba (T.Ken 104: 27-30)

Scientisttemi ashir, alimaji yimya ozüng agi meketbanga lir. Parnok timbai ozüng Tesülenji ozüng Agütsür ka shibai ajak anebalur Pa lir ta amadoker. Shibai alima rangpenji sendaktepdaktsür? Tsüngrem shibai ibai yanglu, Pai sendaktepdaktsür. Teyangluba ajaki Pa dang atar aser nüngdaktem Pai agütsütsü amanger. Ken züluri züluba ama, “Item ajaki nai mapang tetemsü nung parnok nem chiyongtsü agütsütsü ataa lir. Nai parnok nem agütsüba parnoki bendener; Nai ne ket salar, parnok tajung agi asünger” (t.27,28).
Tsüngremi agütsür aser asenoki bendener. Pai moatsür aser asenoki agir. Paji mulunglemtsü; Pai Pa meyong anebalur. “Aji saka temeshipur senzüka yutsüba, mesüra Pa metsü meshimetsüba ni mangu,” ta Dawidi ashi (T.Ken 37:25). Tsüngremji ano tagütsünü. Pai mekümdangi mesüra merumerua magütsür. Pai Pa teka salar, aser teyangluba ajak tajung agi süngtsür.
Tsüngremi taküm aser tasü aser tsüngküm ajak azüoker. “Nai ne jak miimadokdang, parnok timatemer; kodang nai parnok chiyongtsü bener oadoker parnok asür, aser tanaben ali akümer. Kodang ne tangula nai yokdir parnok poktetter. Aser nai alima tejak tasen kümdaktsür” (t.29,30). Metsü tsüngküm kanga tobur tajung, meyi mapang jangratemtsü, Mangkonang mapang süngjang agi sünga alir. Iba sülen tsüngküm arur, aser ibai kanga takong alir. Saka metsü mapang, meyi mapang aser Mangkonang Tsüngremji kasa Tsüngrem, tsüngküm Tsüngrem lir. Pai tasen kümshia metsü mapangji bener arutsür.
Tanü Tsüngremi ne taküm tasen kümshidaktsütsü akok. Pai ne nem metsümenang tsüngküm bener arutsütsü akok. Taküm tsüngküm indang shisa tebulu. Tsüngrem shibai iba lima rangpen repranger Pa ne taküm tsüngküm melenshiba reprangtsü akok. Ne taküm tsüngküm nung lira, Pai ne dang metsü mapang yoktsü ataa liang.