Tashi kechaia Naga nunger menokdangtettsü : Rh. Raising

Dimapur, August 14 (TYO) : Naga nunger linük yangertsü atema olemtep tembangtsü mapang ka tongogo aser iba ya Naga nunger ajaki agizüktsü atema renema atatsüla, ta NSCN/GPRN Kilo Kilonser, Rh. Raising-i ashi.
“Telok balalai anema noktakaka Naga nungertemi ajangtettsü ta NSCN/GPRN-i tamang akar, kechiyong Naga nunger atema putu tenzükogo aser alima nung tashi kechaia asenok tejakleni aoba sota meyutettsü,” ta Rh. Raising-isa ashi.
Deobarnü CHQ, Hebron nung 70 buba Independence Day amungdang NSCN/GPRN Kilo Kilonser-i iba o jembi.
NSCN lenisüba kübok Naga nunger tarutsü kanga junga kümzüka yua lir aser tangari nokdangtsü merangaka, onok maneni tejakleni aotsü. NSCN/GPRN-i kodanga nübortem, Naga yimten aser tangatetba mashioktsütsü, ta paisa metetdaktsü.
Nisung kari kin dak rangloker inyaker aser telemsa adokdaktsütsü meranger. Parnoki Naga nungerji linük, sobaliba, maitsü, putiotsü aser yimten tangatetba ka nungi ta magizüker. Parnoki tsükchir ama bilemer aser iba mashilen tangatetba ajanga Naga nunger ka küma longjemtsü maparen nung tetsükdaktsü ajurur, ta Raising-isa ashi.
“Naga nunger aliba tesem ajak ka küma lokteptsübaji kanga tongtipang. Naga nunger litsü ajak yimten ka kübok aittsübaji Naga nunger temeten lir aser shingaia ibaji menokdangtettsü,” ta paisa shisem.
Tanü sentong nung Naga linük atema taküm bendanga agütsürtem bilemteta tetushi agütsü.
Sentong nung Naga Hoho, Nagaland GBs Federation, Naga Students Federation, United Naga Council aser Naga People’s Movement for Human Rights nunger ketdangpurtemia o jembi, Konyak aser Phom nungeri sobaliba shilem agi aser Liyai Baptist Church-i ken ka aten.