Tashi tasen

Asenok taküm nung aiben anibelemer, lular aser shisabolu agi atonger. Iba mapangji asenok tashi itshitsüba mapang lir. Asenok anibelembaji asenok asoshi dang bilema morumorua inyakba agi asütsüa akok mesüra tangar asoshi mapa tajung inyaktsü dang anibelemba asütsüa akok. Ano, asen temang nung tashidak agi tonger teimla makai shisaboluba agi asütsüa akok. Koba agi asen taküm anibelemdaktsür aser shisaboludaktsür asenoki dang metet. Iba mapangji tashi tasen nüngdaker. Iba tashiji Kibuba nungi arur. Isaia 40:31 nung ashir, ” Shirnoki Kibuba dang ataa alir, parnok tashi tasen angutsü, mongzütem ama tashikang agi atutsü, parnok asemtsü saka manitsü, parnok jajatsü saka melulatsü.” Kodangsa asenok aniadokdir, idangji Kibubai asenok tashi itshidaktsüner, kechiyong pai asenok teti tashi itta lidaktsüner. Aji oda, asenok anibelemer alidang Kibubai asenok nem agütsünüba tashi tasen angutsü atema nüngdakbaji asenoki Kibuba dang atatsüla. Atangji, atatsüba ya tasak saka asenok dangi Tsüngremer temoatsüji asen mapang nung masü Pa mapang nung arutsü. Tanü putu ya balaka teti aritepa dang aliba putu, anungji ajak atema atatsübaji kanga tasak akümer. Aji oda, mapa – mapa arishidang asenoki sarasademtsüa amadoker, Laishiba azüngtsü mapang mangur aser sentepibo moutetter, kechiyong asenok kangasa mazüng. Iba ama mapang nung asenok asoshi asen taginüba ataloktsü atema Tsüngremer mapang ka atatsübaji kanga tasak lir. Ibayongji, aiben asenoki Tsüngremi asen asoshi tajung bilemba dang nungi tekaraba oadoker alir. Idangji asenoki asenoksasa pei taküm aser mapa indang meshisadangi Tsüngrem tsüngdang aibelenadokerr. Aji oda, Tsüngremer sentong matatetba ajanga nisung aika taküm kibong raksaba asenoki angutsü. Ajisüaka, asenoki tamang agi angatettsüba tongtibang kaji, Tsüngremer mapang atabaji tezüdangtsüka masü saka jangratemtsüka lir.  Aji oda, Tsüngremi mulungba mapa inyaka asen mapa nung takok angutsü aser azükarua alitsü teimla nung aliba taküm aser kibongji Kibuba nungi tashi tasen angutsü ataba taküm aser kibongtem asütsü. Kibuba nungi tashi tasen angutsü atartemi mashilen nungi takok angutsü memerangtsü aser takar akümtsü mariteptsü. Kibuba ket nung takok, tenüngsang aser rongsen ajak lir. Item temoatsütemji Pa dang ataa alirtem nem Pai talubosa moatsütsü. Kodang asenoki asen mulungba nung dang inyaka aliba mapatem ajak anener, Kibuba dang atadir, idangji Pai asenok nem Pa sentong angatetdaktsütsü aser asenok taküm ajunga Pa tashi nung dang metaloka aliba angatettsü. Aji oda, asenok asoshi Kibuba mapang tongerbo asenoki inyakba ajak nung takok alitsü, tepela nung asenok temaba jenjang nung alitsü, tebilemtsü ajuruaka akoktsü aser mapasa mapa inyakaka manitsü. Idangjibo, asenok nüngdak ajak Tsüngremi asenok dang sayutsü. Asenoki Kibuba dang mata ser aritepa inyakdang asen anasa temoatsü lir ser nung mangur, idangji amajok nung asenok belemer. Yisu Khristai asen anibelemba meteta lir aser shisaboluba pai angur. Item ama nisungtem nem anisüngzük aser tesünep agütsütsü asoshi Pa alima aru. Mathi 11:28 nung ashir, ” Nenok tebelemer aser khureta abener ajak kü dangi arung aser ni nenok nem anisüngzük agütsüdi.” Pai asenok temenen nung anibelemer shisabolua aliba mulungjangji angur aser anisüngzük agütsüner. Asenoki inyaktsüba mapaji Pa dangi orr atatsüla. Asenok aika shisabobulur, shi aser tanüla nung anibelem aser nükenbelem kanga lir, anungji anisüngzük aser tesünepbo aginür saka Yisu dangi orr Pa tsüngdang mokremer mataner. Iba jagi asenoki  tepela aser tesünep angutsü asoshi lenmang tatsüba aser temelaba bushia aor. Ajisüaka, Laishibaisa ashir, nisung tsüngdang shitak mesükba lenmang ka lir saka aji tasüba lenmang lir. Kibuba lenmang nung pa dang ataa alitsü melen matateti lenmang tatsübalen aoertemji asenok lir. Ajisüaka, Kibubaibo asenok asoshi teti ataa lir. Asenoki dang aseni mulungba lenmang nungi meyiper Pa dang atara, Pa ilen jagi arutsü aser mongnü ama temalenia yima tutettsüsa tashi tasen agütsütsü.