Tashidak wara sama matatsüla

Joko alima nung menatepa aoba tashidak tasen tasen poktetba ya yimya ka ama küma odagi, anungji mapa inyaktsü atema asen alidak tashidak kenyongi mali sama atara, mapa inyaktsüba mapang tajungbo,joko, kodanga marutsüa akok. Ibayongji, alima tensa mapang aser yimya mopong akhi yimya ama masü saka kenyongi balaka melenshiba agi asenok meimchir inyakyim aser libalirua kenyongi balaka melenshi aotsüsa kümogo. Aji oda, tang asenoki ajangshiba mapang ya akhi yimya ama ‘normal’ masü saka balaka ‘abnormal’ , ajisüaka balaka tamajung mebilemi asenok joko libaliru yimya tasen ka nung lia aotsüsa akümer ama bilema aotsü atema, tang tensaba ya ‘abnormal’ masü saka ‘new normal’ ta agir. Iba jagi asenok nem tangatetba tasen aser tajung ka agütsür. Joko, alima nung nisungtem shisarenlokba agi nisungtem nüngdak tapu tapu yangluteta inyakdang, alima tzü mopong tatsük küma menendaktsür.Iba jagi, nisungtemi asaa tashidak wara yanglua mepoktetdaktsüyonga, tashidak tasen aika poktetter. Ano, nisungtem atema timtem lendong ajurutsüba mapa kaji, alima kintem tashi toktep dang raratsü sentong tapu balala yanglur aser item rongnungji mim mopong agi tsükchirtem südaktsütsüsa raratsü asoshia dena renemteper. Ibajibo alijak nung talir ajak samatsüba mapa lir. Iba amaji ka ataloktsüsa mapang aru nungbo, idangjibo tanü asüng asenok Covid aser Omicron tashidak mesen nokdangtsü atema sü mask agiba ya masü saka electronic oxygen mask agir senzütsüsa akümtsü.Item ajakji matalokia ataloktsü ama bilema nisung ajaki pei kiji tanurtem asoshi kaketreju aser tenla ki ama bilema libaliru yimya tasen ka tenzüktsü nüngdak kümogo, Kasaji, lendonga liang teli, taküm alitsü asoshi chiyongtsü nüngdaker aser chiyongtsü angutsü atema alubosa ayimtsüla aser alu mayimertema jangotsü alitsü atema langkabosa inyaka sen aatsüla. Tetezü, kimalen mopong nung temenatepba tashidak bener jajadagi ta ser tanurtem kaketshisatsü mebushitsüa masü aser asenoka mapa meinyaktsüa masü.Tanur-a aser tain-a pei mapang nung pei teinyaktsübo inyaktsüla, kechiyong tashidak wara liang teli, küm aser mapang agibo asenok matatsü. Aji oda, iba ama putu yimya tasen ka nung asenok ali tenzükdang, memeteti iba libaliru yimya tasenba yagi kibong kar alar jenjangi ludaktsütsü aser karbo jenjang tajungba kati tur alitsü. Ibaji angatettsü atema, asenoki asen tanurtem rongnung taintem peisasa zülutetter aser züngtettertembo ken toktsür, 2020 küm, küm pezü junger kaketrejui aotsü tenzüktsü purtem, kaketreju junga mangu ser tang class 1 nung amener, kechiyong kaketshidaki maoyonga kidang lia online class agiogo. Ajisüaka, tanurtem rongnungji kidang tsüraburtemi parnokang tesayur kümer sayurtem o mesayurtem na tsüngdang ongdang talangka adokadoktsü. Iba amaji, tashidak wara agi senzüsenponga mesademji ta ser kidang dang kazüa amongertem o yimti nung nisungtem den külemi ali majungji ta ser alu nung aser pei mapa inyakdak lia mapa rateta inyakertem rongnunga tepila talangka kümadoktsü. Aji oda, asenok akhi libaliru yimya nung alir masü libaliru tasen balaka “ new normal’ nung alir asünungji, joko asen ki agi school aser tenla ki kümer tanurtem dang alima shisatsü aser tanüla chiyongtsü agütsütsübaji tanü putu inyakyim tasenba asütsü. Iba denji külemi, joko alima mapang aser mopong agi nisung aika adenshia mapa inyaktsü mesademi akümer asünungji, asen kijai kechi mapa tajangzük lia inyaktettsü ta bilema libaliru inyakyim tasen tenzükba den külemi asen inyaktsüba mapa sentonga putu yimya tasenba den putepa sentong tasen tenzüka inyakra, asenbo  tajangzük keta inyaktetba mapatem nung tanishir akümtsü. Alima tashidak wara agi mapa inyakdak, kaketshisatsü angazükdak aser Tsüngrem külemdak  ajak shibanga ayuba agi asen dang kaketshisatsü tebushi, mapa teinyak aser Laishibaa tebushi aser sarasadema tesü ta ashirba masü saka inyakyim melenerba dang, anungji iba inyakyim tasenba nungji asenoki otettsüla. Alima nung nisunger libaliru aser inyakyim ya alima ali tashi tasen-tasen melenpet melena aotsü aser shiri iba ama temelenshi tasen aruba den putepa sentong atonga otetdir, parnokjibo alima nung tashidaka mali ama jangratema tajungba tajungba lia otettsü. Tang ama alima nung tashidak wara poktetba ya tasütsü wara masü saka alima nung meimchir libaliru aser inyakyim melenba ‘new normal’ tenzükba mapangang ka ama bilema asenoki inyakra, asenok asoshibo, ibai, temelenshi tajung ajuruba temoatsü mapangang ka asütsü.