Tashimait akümba

Alima nung nisung taküm alirtem atema lendong tulutiba mapangji Tsüngrem tanüla pei dak nungi pilaa orr aliba mapang asütsü. Anogo shia asenok inyaksangshi nung tebilemtsü ajurur saka akoker. Tangar asoshia asenoki teyari tajung agütsüteter. Tangari asenok dak temulung lemtetter. Makamait aser timtem ajuruyonga tizüktetter aser asenok mulungjang nungi tepela mesamar. Lendongtsüdong agi meketbanga lir saka kecha shisamebulur. Teti tasü ititta dang alir. Ibaji tapi agi masü saka asen dak langka lir. Ibaji asenoki mangur saka aji asen dak aliba Tsüngrem tanüla tashi agi inyaker. Iba jagi asenoki kecha metsübur, shisamebulur aser pelapelaa dang alir. Aji oda, Tsüngrem tanüla pa dak ali tashi Samson-i kecha metsübu aser ajak akok. Filista kin-ia pa makok aser arem shiruru tesashijia pa tsüngdangbo kecha balaka tetsübutsü aketba shiruru masü liasü. Ajisüaka, kodang pa dak nungi Tsüngrem tanüla pilaa ao, idangji pa tashimait aküm. Ano, Samson atema lendong tulutibaji pai pa dang nungi Tsüngrem tanüla pilaa aoba memetetbaji liasü. Obendanger 16:20 nung ashir, ” aser lai ashi, ” Filista nunger na bushia arua lir, Samson !” Anungji pa sak aser ashi, ” Ni akhi ama küsasa jenteta otettsü !” Kechiyong Kibubai pa toktsüogo ta Samsoni memeteti liasü. Asenoki Tsüngremi ashi mangaba ajanga Tsüngrem tanüla asenok den meliteti aor. Idangji, asenok kanga tashi mait akümer, Asenok temang nunga kodang tashi mait lia tashidak mopongsem agi atonger, asenoki ibaji metizükteter aser shirangadoker. Yamaji, kodang asenok dak nungi Tsüngrem tanüla oadoker tashi meiti lidir, idangjibo tatidang tilaka nunga tsüker aser timtem tilaka atalok nunga tsübur. Iba mapangji asenok atema lendong mapangji lir. Ajisüaka, ano iba dang nungi lendong tulubaji Samson ama, asen dak nungi Tsüngrem tanülabo oadokerser nung asenoki mao ama bilema, Tsüngrem tanüla tashi nung akhi ama inyaktsü aser alitsü bilembaji asütsü. Kodang asenok dak nungi Tsüngrem tanüla oa adoker asenoki sarasadema mesütettsü. Akhidangbo, aseni sarasadem nung tashi tulu liasü saka tangbo iba tashiji mali akümtsü. Akhidangbo, asen libaliro ajanga aika temoatsü angu saka tangbo asen taküm ajanga aika metsüdaktsü. Akhidangbo asenok ajanga dang tangar putepdaktsü saka tangbo asen ajanga meputep adoktsü. Tangar ajaki asen dak temulung lemteta liasü saka tangbo asen dak shingaia temulung melemtet akümtsü. Aji oda, asen dak nungi Tsüngrem tanüla tashi aobaji mangur saka asenoki asen taküm nung mapa ajanga metettsü. Iba amaji pei dang nungi Tsüngrem tanüla pilaa aoba memeteti ka aliba mapang, tsükchirtemi Samson melamelaa pua bener ao aser pa taküm yangji sama. Tsüngremi asenok ajak meimer kechiyong asenok pa chirtem, anungji asenok lendong timtem nungi kümzüktsü atema Pai asenok dak Pa tanüla temeshi lidaktsür. Ajisüaka, tanüla temeshi ya temenen mapa inyakdak alitsü makok. Aji oda, kodang Samson ama asenoki Tsüngremi ashi manga temenen mapa inyakdir, asen dak nungi tanüla temeshiji meliteti oa adoker. Ibaji tulur aser takar ka tsükchir agi meketbanger lendong nung aliba mapang ‘bodyguard’ temi toktsür ao ama asütsü. Alima nung ali tashi asenok dak Tsüngrem tanüla alitsübaji kanga tongtibang asütsü.Tsüngrem tanüla tashi aser teyari medeniang asenoki asen taküm aser kibong anir moutettsü. Tsüngrem tanüla teti asenok dak alitsü asoshi asenoki teti Tsüngrem dang sarasadema Pai mulungba ama alitsüla. Teti asenoki asen mulungjang, asen libaliro aser asen jakla yimya tamajung ali mali, itemji Tsüngrem nem bushidaktsütsüla. Aji oda, teti asenoki Tsüngrem pelatsüsa inyakra, Tsüngrem tanüla asenok den alitsü aser Tsüngrem tanüla asen den ali tashi shingaia aser kechaia asenok maraktettsü aser makoktsü.