Tashimaitertem den

Alima nung tamangba yimsü kar nungbo tsüngrem nem bendanga agütsürtembo lokti nungi pilar azüngmeyakdak balaka nung alir, ajisüaka Khristan yimsü dak amangertem asoshibo yamaji masü. Khristan taküm ka lokti nungi pilaa alitsü makok, ibayongjiang arogo tenzük. Aji oda, Khristan yimsü yabo amangba purtem külemi telongjem ka nung amangtsüba yimsü ka lir. Iba jagi kodang aseni temenen menadir, iba jagi asen dak dang masü saka asenok adenba lokti dena kangshidaktsür. Iba kasaji kodang aseni Tsüngremi mulungba inyakdir, iba jagi asen dang masü saka asen kinunger, asen lokti aser asen arogo dena moatsür. Iba jagiang tenyar Peter-i Asia nung aliba Khristan purtem dangi züludang, ” nenok teshimtetba kin, chuba putir telok temeshi kin,” ta 1 Peter 2:9 nung shia angutsü. Tetezü asenok Yisu Khrista sülen anidaker asütsü asoshi shimtetba Khristan purtem ya kija kija balala alitsü asoshi shimtet masü saka telok küma Tsüngremi shimtetba kin ama alitsü asoshi shimtet ta asenok nem angatetdaktsüner. Ibayongjiang, kodang Korint nung tiyazü tesayurtem adoka amangba purtem tamang nung metsüdakdaktsür aser tanüla nung atsüngzüka oa tashimait akümer ta angashi, Paul ajemajema mena melitet aser pa mepelateti aküm. Idangjisa, Paul-i Korint nung alir amangba purtem dang asen temang nung tenüktelen koda yariteper, yamaji külem amangba pur ka peladang külemi pelatepang aser tejashi nunga külemi lemsatepang ta ajungshiba oren ka 1 Korint 12:26 nung shia angur. Asenoki aiben asenok külemi alir amangba purtem den tepela aser tejashi lemsateptsü mebilemteti asena asen ali alir. Ajisüaka, ibaji Khristan taküm yimya dak maket. Khristan purtembo kati ka den yaritepa alir, iba jagi dang kati ka tamang nung tashi itdaktsür. Atangji, aiben asenoka tamanger tajung ka ama amanga aodang asenok külem arogo purtem den melongjemteti asena asen kija aseni mulungba aser jangraba lenmang nung ooya alitsü akok. Idangji aiben asenoki külem arogo nungertem dak kechi ataloker aji memetettsü. Ashiko, külem amangba purtem kar tanüla nung atsüngzüka ooya alitsüa akok mesüra pei taküm aser kibong nung timtem atalokya alitsüa akok. Itemji asenoki metettsüla. Iba ama mapang nung asenoki tashimaitertem maitsüi mesüra tenüng meseni tonga orr parnok den tebilemtsütemji lemsatepa yariteptsüla. Iba amaji asenok amangba purtem nem inyakdaktsünüa tenyar Pauli Korint nung aliba amangba purtem dangi züluba lir. Aji oda, asen meketa aliba tesemtem nung külem Khristan purtem reshikangshiba asenoki memetetra aser aser metetyonga parnok timtem tekangshiji asenoki parnok den melemsateptetra asenok tamangba jenjangji ken jungjunga meyipa reprangdangtsüba tia nung lir ta asenoki metetdi. Shitakba Yisu Khristai agütsüba temulungjang aser shisatsü adenba Khristan katibo külem amangba purtem pelatepdang mepelaiang malitsü aser parnok timtem reshikangshi aser shisabolu ajurudang tezü ka nung pei kija anisüngzüka melitettsü. Paul daka iba mulungjang liasü. Iba jagi pai ashi, ” shiba tashi mait, nia tashi mait masü no ? Kodang kar temenen nung tsükdir, idangji nia jashia akümer masü no ?” 2 Korint 11:29.  Tetezü, asenok amangba purtem ajak dak pei pei yari tashimait lir, anungji asenoki tangar dakang tashimait repranga maitsüi, tashimaitertem denji pei tashimait indang jembia tashi itshidaktsütsü indang ashir.  Iba amaji, asenok tamangerbo tamanger ser nung asenok dak tangar den tepela aser tejashi melemsatepnüba shisatsü lira, Tsüngrem dang iba shisatsü melena tangar khuret lemsatepnüba shisatsü enokjang ta sarasademdi. Khristan taküm yabo ni dang junga lira ojang ta masü saka tangar asoshi aria bilemba taküm ka asütsüla. Iba jagi dang asenoki tangar dang Tsüngrem temeim indang shitettsü.