Tashitak wara den raradang nübur tsüngda rara madoktsüsa kümdanga inyaktsüla

~ L. Kika Pongener.

Alima nung mimchir shingaia kodanga pungmang nunga mepongmangba, taoksatsü/tetsübutsü tashitak wara tesashi ka pokteter, anung küpok aliba mimchir ajak khangshidagi aser taküm aika samadagi. Aji oda, iba wara tesashi nungi jenbua alitsü atema Centre Sorkar & State Sorkar-i anir lokti-tentet ajungai tapet tzüzüng-ozüng yanglur azüokba ajanga, asen India lima nungbo, iba tashitak aketer aser iba tashitak agi asür kangasa ajema aliba ngua Tsüngrem tenung asanger. Talisa, asen Naga lima nung asen nuburtembo, iba tashitak agi ka danga metongi kümzüka ayuba atema Tsüngrem tenung sangdi. Anungji nübur ajaki iba mapa tajung atema sorkar tenzükertem, yimten yimsusurtem aser lokti lennirtem, shirnoki iba tashitak wara tesashi den raraba mapa nung tongti shilem agia inyaker, parnok nem tenungsang agütsütsüla, aser nübur ajaki pei akokba mapa agi amalitepa, nungita, yariteptsüla. Ano iba dak alaka, iba wara tesashi nungi kümzüka alitsü atema kechisa teinyaktsü mapatem sorkari anir lokti-tentet balalai temzüng-ozüng lateta yuja lir, item ajak nungji nübur ajungai tashi angatsüla, kechiyong iba wara yagi tulur-tilar, takar-sensaker, tanak-temesung kecha tebendang mekai kongshitsü. Anungji iba wara den tongpang raraba mapa nungbo nutsüng nübur ajungai külemi teka amtepa longjemer, pei pei akokba shilem agia inyaktsüla.
Ano iba dak alaka, nutsüng nuburtemi sorkar dak nungi yimlabaji, tekaratiba nung iba tashitak aketertem anepalua yaritsü atema District shia nung mozü-ki tesadem, oda nisung noklang ishikabo mapang kasa nung külemi yaritettsüsa renema akatsüla, aser iba den sentaktepa nungdakba osettsüset/mozü-mora ajak peria ayutsüla. Aji oda, iba mapaji ‘o’ agi dang masü, mesura yimjak nung yimyim ayimoktsüba dang masü, saka asangsang nung mapa agi renema akatsüla. Aji oda, tashitak keta ali mali tendangtsü atema asen lima nung kol maliba agi tzüma limai dang yoker sura, ashiko mapang kabo parnok dangi meyoktet nokdangra koda asütsü (?)…ta nuburtem tsübuseter. Anungji iba tashitak tendangba kol-ji asen Naga lima nunga tekaratiba nung renema ayutsüla. Ano iba tashitak wara den tongpang raraba yabo nübur telok-telok tsüngda nung ken o kar mangatettep adoka raraba azüoktsüba (Law and order) tesashi ammer, tashi amshitsüba mapa ka masü, saka tashitak wara nungi kümzüktsü asoshi tazüokba mapa inyakerba dang, anungji sorkar ozüng ammertem, Security Forces, Ward/Colony/Village nung Council Members & GBs, NGOs & lokti lennir ajaki sungjem-sungjema tazüokba nung, yimya tajung agi inyakra, ibajagi asen lima nübur ajak atema takok tulu angutsü. Hau nii…alima asünungji maha-mangatet/tashi mangar-a karbo alitsü akok, ajisuaka, akokba tashi timyim agi angatetdakja, tashiyim mamshii azüoka inyaktsü merangtsüla.
Ano iba mapa nung tongti shilem agia inyakertem…Doctors, Nurses, Security Forces, Council Members, GBs, Volunteers etc. ajaki nuburtem dang kechi koda tazüokba nung alitsü tuyur… Tatishitsü agi…. Nisung aika sentepa mekazütsüla, Mask shitak agitsüla, nisung o nisung na tsüngda ‘Metre’ kabosa distant ayutsüla. Aji oda, iba mapaji parnok-ia shitak inyaktsüla. Ajisuaka, nuburtem dangbo tazüokba nung alitsü tuyur, saka parnokbo yamaji magir/malir ta sura koda !!!??? Kechiyong iba tazüokba nungjagi parnok-jia jenbua malia ta angatettsüla. Ano iba mapa inyakdang tangatettsü aser tekümdangtsü kaji, iba tongpang raraba mapa ya telok-telok tsüngda mangatettep adoka raraba ka masü, saka tashitak wara tesashi nungi kümzüka ayutsü atema tim teinyaktsü tazüokba mapa inyakerba dang, anungji Ward/Colony/Village nung yimsusurtem, Council Chairman, GBs, Council Members, Security & NGOs lennir ajaki, shisatsü tesadem agi aser tangatetba tajung agi tanak-temesung mebendangi, aser tashiyim mamshii timyimi nübur ajak den kasasa benshitsüla. Aji oda, mapa tajung inyakdang tashiyim amshia tim mesui inyakra, mapa tajung agi mapa tamajung akümtsü, aser nübur tsüngda nung tajung melena mepetmesu, telemsa, tsükchitep aser raratepang adoktsü ana nung lir. Atangji, iba tazüokba mapa inyakba ya telok o telok tsüngda nung tashi sayutepba/tashi amshitepba mapa ka amai mekümdaktsütsüla. Ano iba ama mokdanga yur aliba mapang, nübur ajak kar amai dangbo masü, ajakbo takar masü, karbo sensaker mekokmeiner-a alitsü, ano senotsü aliyonga Bazar/Dokan-i talitsü mooteti tachi-tajemtsü mekai timtema karbo alitsü akok. Anungji akokba tashi iba ama timtemba mapang, talisa arogotemi mapa tajung inyaktsüla. Hau nii…tanü tashi nung arogo aikati mapa tajung inyakba ngua arudagi. Atangji, arogo-i dang masü, telok-tentet (Soceities & Unions) aser nija rongsen akar aikati mapa tajung inyakba ngua arudagi. Ajiser, iba ama mapa tajung inyakba nung yimten yimsusuri anir lokti lennirtemi, küli tapu tapu bushitepa jangjungmara masütsüla aser menokdangtsüla. Ano Ward/Colony/Village-tem nung nuburtem dang nungdakba oset, jang-otsü, aonsotsü etc. ayokba aser lemya-lemkoba nung, tejak repranga, tanak temesung bendanga shingaia meinyaktsüla, kechiyong iba tongpang rara ya nübur telok-telok tsüngda raraba ka masü, saka tashitak wara tesashi den raraba ka dang ta angatetdi. Anungji kari yamaji benshira, ajibo kangasa mashi-malo tangatetba asütsü. Kokrabang yimsusur aser lennirtembo shishilempaba, mesura tajangzük bushiba mapa nung merangloki/medeni nübur timyimi azüoka ketdangsua acha-ayangba mapa nungang nentaka inyaktsüla. Anungji arung nübur tulu-tila ajaki longjemer iba tongpang tesashi ya takok angutsü asoshi pei akokba shilem agia meranga inyakdi.