Tashitemetet putu nung sobaliba tesendok : S.Chuba Lkr

Chakpa yimtak Poanglum benjungmung nung Veterinary & Animal Husbandary, Parliamentary Secretary S.Chuba Lkr kentena agizükba noksa angur.

Mokokchung, December 20 : Tanü putu ya kanga dang pettepa toktepa ainba putu ka lir, iba ama tensa ka nung nisung shinga mazüngi dang alir saka alima den tsüngkang medema onüdang pei sobaliba mesentoktsüla, ta yashi Veterinary & Animal Husbandary, Parliamentary Secretary S.Chuba Lkr-i Chakpa yimtak Chakpa Chang Poanglum sobaliba benjongmung sentong nung jembidang ashi.
Poanglum benjungmung ya tsünüsenbongtsü yoker aliba aser yoktsü aliba nung azükaru asütsü asoshi temoatsü meshia amungba lir.
Tanü putu nungbo item dang nungjagi nübur tsüngda nung telongjem akatsüji kanga agi tongtipangba lir, anungji nübur ajaki telongjem asoshi nentaka inyaktsüla, ta S.Chuba Lkr-i ashi.
Paisa, “Chakpa yimtsüng ya kin ana agi akümba (Ao aser Chang) yim ka lir, Naga lima nung aliba yimtsüng 1000 dak tema lir aser item ajak dang nungi Chakpa yimya kanga agi balaka lir, kechiaser kin ana süaka nenok telongjem ka, temeim ka aser inyaksangshi ka dang lir,” ta ashi.
“Tanga yimtsünga Chakpa yimtsüng ama kin ana agi akümba lir saka parnok inyaksangshi khenyongi balala lir, nenok ama telongjem mali, anungji nenok yimtsüng nüburtem kin balala süaka longjema aliba ama iba telongjem benshiba ajanga temoatsü ngutetba nüburtem dang inyaka sayutetang”, ta paisa ayongzük.
Iba sentong nung Chakpa Village Council Chairman Imsumeren-i tepela o jembi aser S.Somba Chungtembou-i Poanglum benjongmung teratet metetdaktsü.
Sentong nungsa lenir aikati shilem agia jembiba den sobaliba yar tsüngsang aser kenten menü balala nung shilem balala agitepa iba sentong kanga dang mera ket keta longso longsoa agia liasü.