Tashiyim agi masü ken o jembiba ajanga yimten tebilemtsü akoktsüla : CM

Kohima, November 19 (TYO) : Naga yimten tebilemtsü ken o latettsü asoshi tashiyim agi masü saka yimjung nung ajurutepa jembiba ajanga dang akoktsü ta India sorkar o Naga yimten teloktem na pronglai angateta lir ta Chief minister, T.R.Zeliangi metetdaktsü.
Tanü Kohima nung Norwegian Ambassador to India, Wb.Nils Ragmar Kamsyag den sensaksemdang Chief minister-i pa dang iba o ya shia liasü.
NSCN-K telok dak alaka telok ajaki injang amshia raraba mapa ya amajok ta rajemogo aser joko teti atema telemtetba kati arutsü atema India sorkar den yimten ken o benoka jembi tenzükogo ta paisa ashi.
” Naga yimten tebilemtsü ya tekarartiba nung koka telatetba kati arutsü asoshi Prime Minister-i mulungtetba asoshi pelar aser NSCN-IM telok den August 3, 2015 nü yimjung nung ken o latettsü asoshi tangatettep ken o yangluba ajanga inyakyimbo lateta yuogo,” ta paisa ashi.
Ano, Myanmar nunga tawa election agiba nunga Aung San Su Kyi adokba ajanga par lima nunga la shisatsü ajanga yimten tebilemtsütem koka bener aotsü imlar,” ta Chief minister-isa metetdaktsü.
Paisa Narendra Modi nüng sanga ashidang, tang tashi nung Naga yimten tebilemtsü akoktsü asoshi bendanga agüja inyakertem rongnung Narendra Modi ama ato kilonser shingaia meinyak ta metetdaktsü.
” India sorkari Naga nunger yimten otsü yabo tangar dang nungi balaka ta angateta lir, aser Naga nungertemia India yimten tia angateta lir, iba amaji telok anapronglai kati ka dak metaloka lia aotsü nüngdakbaji angateta lir, anungji yakta telatetba kati arutsü imlar,” ta paisa metetdaktsü.
Tang NSCN-K o India sorkar na tsüngda yimjung nung meliaka, Naga nungertemi aginüba ama parnok tsüngda yimjung lapoktsü imlaa atar ta Chief ministerisa metetdaktsü.
Norwegian Ambassador ya pa second secretary Mr Johaan Loov den aru aser tena asüng Manipur-i aotsü.