Tashiyim agi raksatsüba ajanga asoba tanuri tebu senmang amangtettsü

Lucknow, November 4 (Agencies) : Tashiyim agi raksatsüba ajanga asoba tanur kati tebu senmang amangtsü akok ta Bodbarnü Allahabad High Court-i obendang agütsüogo.
“Iba tanurji tashiyim agi raksatsüsangi ozüng alema bener aruba tanur ta züngshitsü aser pa senmang amangtsü temeten angutsü. Ajisüaka tanurji adoption atema agütsüra, pa/lai tebu senmang amangtsü temeten kecha mangutsü” ta Justice Shabihul Hasnain aser Justice DK Upadhayaya division bench-i tanü obendang agütsü.
Tashiyim agi raksatsüba tetsür tanur kati okadak ken o benokba ka angadang division bench-i iba obendang agütsü.
Tanutsüla aser la tebu tenati tanur ayutsü memulunger aser iba jagi tanur ji adoption atema agütsünür ta okadak ken o ka benok.
Iba dak sendakba nung Allahabad HC-i Uttar Pradesh sorkar dang tanutsüla nem sen lakh 10 teyari agütsütsü tetuyuba agütsü.
Okadakisa sorkar dang tanutsüla degree level tashi azüngtsü atema angati residential education aser iba sülen mapa agütsütsü tetuyuba agütsüogo.
Iba tatalokba atema sorkari tanutsüla nem sen lakh 3 bo teyari agütsüogo.
Tanutsüla arishi küm 21 ajungba sülen agizüka amshitettsüsa sorkari agütsüba senji nationalised bank ka nung fixed deposit nung yutsütsüla aser la indang temetettsü yimjak nung memetetdaktsüi miimbanga ayutsüla, ta Allahabad High Court-i tetuyuba agütsü.
Okadakisa, doctor temi anir aotsü telemtetba magi tashi kinü tanurji mozü kidang yur anepalutsü aser iba sülen child welfare committee nem agüja parnoki anepalutsü atema tetuyuba agütsüogo.