Tashiyim agi tetsür tak mapa tamajung inyaker merenshitsüla: Conrad Sangma

Shillong, January 15 (Agencies): Yimti nung tetsür chanu ka dak tashiyim agi mapa tamajung inyakba ken-o nung aija alir ajak merenshitsüla, ta Tura MP Conrad Sangma-i metetdaktsü.
Ozüng nung aibelena alirtemji shitak temerenshi agütsütsüla, ta pai osangbener den jempidang ashi.
Iba tetsürla dak tashiyim agi mapa tamajung inyakba ken-o nung kuli tejangja ngutetra, Home Minister jia pa menden nungi aludaktsütsüla, ta Sangma-i shisem.
Ajisüaka, ozüng alema mapa tamajung inyakba ki ji Home Minister indang asübayongbo pa mapa nungi manentsütsüla, ta paisa ashi.
“Pa kibur süa aliba ki nung ozüng alema mapa tamajung inyakba nung pa sentaktepa aliba kuli lira, pa mapa nungi anentsütsüla,” ta Sangma-isa ashi.