Tashiyim amshia raksatsür arishi küm 15 purtemji tain ama züngshitsüla: Kejriwal

October 19, 2015 nü Delhi Cabinet senden amenba sülen Delhi Chief Minister, Arvind Kejriwal aser Dy Chief Minister, Manish Sisodia nati osangbenertem den jembiba noksa nung angur.

New Delhi, October 19 (Agencies): Taoba hopta Delhi nung tetsür chanu ana tashiyim amshia taküm raksatsüba dak sentakba nung tanü Hombar nü Delhi chief minister Arvind Kejriwal-i, tashiyim amshia taküm raksatsür arishi küm 15 ser temapur ajakji taintem anema ken o benokba ama kasa züngshitsüla, ta ashi.

Bushisüngdangertemi, Hokolbar nü Delhi nung arishi küm ana ser tesadang tetsür chanu ka taküm raksatsür tebur anaji ‘teenagers’ (arishi küm 13-19) lir, ta shiogo.

Tanü Delhi nung osangbenertem senden ka nung jembidang Kejriwal-i, tetsür kanga tanurtem tashiyim amshia raksatsürtem taküm tepiyong tepouktak ayutsü mesüra tasüba agi merenshitsü atema reprangshitsü asoshi minister temi akümba committee ka tentettsü, ta sangdongogo.

Paisa, tashiyim amshia raksatsüba ken otem atema state sorkari special prosecutors shimtsü aser item ama ken o atema fast-track court asoshi mepishitsü, ta ashi.

Law minister Manish Sisodia lenisüba nung akumba committee-i anogo 15 tsüngda iba report ji agütsütsü.

AAP tongti lenir Kejriwal-isa, Delhi nung tetsürtem anema inyakba mapatem tali atalokba tongtibangtiba kuliji- temzüng alema inyakertemi ozüng amenertem metsübuba ajanga lir, ta ashi.

“Tashiyim amshia raksatsürtemi parnok dak kecha mataloktsü ta bilemer. Nisung tamajunger ajakji Delhi nung dang lir masü, aser Kolkata, New York, London mesüra Varanasi yimtitem nungbo tsüngrem metetertem dang lir masü. Iba ya Delhi nung ozüng metsübuba ajanga lir,” ta ashi.

Yashi Kejriwal-i, arem ozüng dang lira pai Ato kilonser Narendra Modi junga memejangdaktsütsü, ta shiogo, iba den külemi Delhi police ya par sorkar nem küm ka danga agüjang, ta takhangba agütsüogo.