Tashiyim mapa inyakba ken o nung Meghalaya MLA ka bushir

Guwahati, January 05 (Agencies): Taoba ita Meghalaya nung küm 14 tain tetsür chanu ka dak tashiyim mapa inyakba ken o nung aija alisang Independent MLA, Julius Kitbok Dorphang nem Shillong nung court ka ajanga ‘non-bailable warrant’ agutsüba sülen pa atsükshia senzüdar.
IPC Section aser POCSO Act nung ajemdaker pa aija lir. December 15 aonung Shillong nung aliba guest house ka nung iba tetsürla dak Kitbok Dorphang-i tashiyim mapa inyak, ta December 16 nung tetsürla ajanga FIR agutsüba sülen lokti tentet telok anati pa aputsü asoshi takhangba agütsü tenzük, aser Shillong nung aliba court ka ajanga Bodhbarnü pa bail nung magizüki tepoukdak ayutsü asoshi obendang agutsü.
Dorphang ya Mawahati constituency nungi MLA lir. Iba guest house ya Meghalaya nung senior minister ka jabaso indang lir, aser sorkari aibelener miimbanga ayur, ta lokti tentettemi aitsür. Tetsürlai iba FIR nung nisung 8 tenüng agutsü aser parnok rongnungi parnok pongubo pua lir.
“Mapang talangka jenshia senzüba ajanga court-i Dorphang iba ken o matem tashi tepuoktak nungi mechioktsü ozüng agutsü,” ta East Khasi Hills nung SP M Kharkhrang-i metetdaktsü; aser iba MLA abutsü bushiba mapang lir, ta paisa shia liasü.
Küm 51 tain Dorphang ya politics nung joint süa 2013 küm Independent MLA aküm, aser pa telung nung alir Hynniewtrep National Council (HNLC) telok nung 1993 nungi 2007 tashi mendenbuba inyaka liasü. Jala ana tebu Dorphang ya, IPC Section 366 (A), Protection of Children from Sexual Offences Act (POCSO Act) Section 3 (a)/4, aser Immoral Trafficking Prevention Act (ITPA) Section 5 nung ajemdaker aija lir.
Iba ken o junga bushisüngdang masüba atema melungmasü olen ka Shillong nung aliba Civil Society Women’s Organisation (CSWO) Tir, Agnes Kharshiing ajanga ashi. “Dorphang ya MLA ka lir aser pa Meghalaya sorkar pusemer ka asüba ajanga mitkar nem nüngdak maliba khuret aika agutsüogo,” ta lai ashi.