Tashkent nung ayongba SCO senden nung Rajnath adentsü

New Delhi, October 31 (Agencies): Hokolbar nungi Tashkent nung tenzüktsü aliba Shanghai Cooperation Organisation (SCO) council of heads of government (CHG) senden nung India tenüng nung Union Defence Minister, Rajnath Singh adentsü.
SCO ya Regional security grouping ka lir.
External affairs ministry sangdong ka ajanga, “November 1-2 anogotem nung Tashkent nung ayongzükba Council of Heads of Government (CHG) of SCO senden nung India tenüng nung Rajnath Singh adentsü,” ta metetdaktsü.
2017 küm India SCO züngsem akümba sülen tang agi tasembuba CHG senden ayonger.
Taoba CHG senden anaji 2017 küm Sochi, Russia nung agi aser 2018 küm Dushanbe, Tajikistan nung ayongzüka agia liasü.
Tashkent nung ayongzükba senden nung lenirtemi SCO region nung rongsenkettsüng tsütsü amalitepa inyaktsü aser rongsenkettsüng terenlok atema jembitsü, ta MEA-isa metetdaktsü.
SCO senden aliba mapang nung Singh-i tanga linüktem den-a jurila senden amentsü.
SCO ya trans-regional international organisations tulu rongnung ka lir, aser yangi alima nütsüng shilem 44 shi lir. SCO litsüji Arctic Ocean nungi Indian Ocean tashi aser Pacific Ocean nungi Baltic Sea tashi nung lir.
SCO nükjidong ya region nung yimjung aser security atema lir. Iba telok nung India aser Pakistan nata 2017 küm züngsem aküm.
Russia-i nungitba ajanga India-a SCO züngsem aküm aser Pakistan-a züngsem akümtsü atema China linüki nungita liasü.
India-i SCO züngsem ka ama region nung kiralongra amokmeren atema tongtibang shilem agitsü ta sangdonger inyaker.