Tasoba Anogo

Tanü ya Tir Yimyim adok tenzükba anogo lir. Aji oda, 2003 küm October 08 nü mezüng Ao oshi nung anogo shia adokba osang kaket ya adoka tenzükba memeteti ka dang küm 21 jungogo. Atangji, Tir Yimyim madok danga Ao oshi nung osangkakettem liasü saka item osangkakettemji kar ita nung aser kar hapta nung khen-anaben ta adokba dak alaka anogo shia adokba Ao osangkaketbo mali asü. Aji oda, alima aso 21 bubai aidangbo internet inyakyima tekaraba aküm aser joko mobile phone-a aruadok, anungji nisungtem tsüngda chilachiteptsü kanga melara kümadok. Iba denji ano television sentong tapu balala ajanga alima tesem ajaklen tanü atalokba tanüsa metetadoker, anungji asüng osangkaket nung adokba osangtembo mazüngdangyongi metetadoker alir. Aji oda, osangkaket azüngbajibo television nung aruba to jangjashitsü atema azünger aser ano aikati osangkaket nung adokba osangtsüsang masü saka tazüngertemi onük balala nung shisalemsatepba aser yimozüluri züluba yimobilem züngnüba agi osangkaket agir. Iba ama alima kangasa karaa aienba putu tensa ka nung Ao kin makaba rongsen kaji anogo shia adokba osangkaket liasü. Kin tulu tila kecha mali, Ao kin a alima nung tangar ama kin temeja kin ka, anungji Aortem rongnung tzüim telong nung senzürtema alitsüla aser anüng tom nung tayimtsü anir jajartema alitsüla. Item jagi kin ka sübotsü abensadaktsür. Aji oda, küm 21 jakdang Ao kin kanga nüngdakba sübotsü kaji anogo shia adokba osangkaket liasü. Iba nüngdakji asenok nem Kibubai reprangtetdaktsü. Ibayongji, anogo shia adokba osangkaketji madok tashibo temulunga animesüngzüktet lia arur, Kibubar anogo October 08, 2003 anogo nung anogo shia adokba Ao osangkaket ka tenüng agi Tir Yimyim adoktsü tenzük. Iba osangkaket ya küm 21 tashi adoka arudang tazüngertemi aser ano talisa asen nübortemi sapua azüngba ajanga iba osangkaket yabo osangkaket danga taoba asenok ajurutepa sensaksemdak lenjem tajung ka mesemtet ama, anogo shia hapta nung anogo tenetnüprongla ajuruteptettsüsa Tsüngremi asenok moatsüogo. Atangji, tang tashi nunga osangtsüsang bentepba nung asüyonga mesüra shisalemsatepbaren nung asüyonga  Tir Yimyimi merajemba, mayimjemba aser metongjemba tesem aser maparen aika lir. Aji oda, kenüa mati küm 21 tashi osangkaket adokteta aruba agi pelar dang ashi, onokia onok mapa nung temulung masür, anungji tajungba küma inyaktsüba tesem aikanangka anendaka lir. Item metongjem aser merajemba tesemtemji tongjema aser rajema inyaktsü asoshi tazüngertemi onok den atsüayonga melii pei bilemba shisatsü aser reprangtetba mapa aser jaklatem indang lemsatepdaktsüner. Atangji, Covid wara sülen nungi aikati osangkaket malir saka tazüngbo azünger, kechiyong onoki online nung lemsateper. Ibaji senotsü tsütsübo onok kanga takoksa saka osangkaket züngdaktsünüba agi onoki social media nung lemsateper, anungji Tir Yimyim azüngerbo lakh junga alitsü südi. Ajisüaka, online nung azüngba o shitakba osangkaket teben nung amer azüngba na tetsüngda balala lir. Shibaibo online nung mesüra WhatsApp nung aruba osangkaket rangben zünga kazütettsü ? Iba jagi tenükang raksatsü aser mapanga amajok nung talangka endoktsü. Ano, onük mesüra osang kar tarutsü atema rezünga yunü nunga electronics ajanga arubaji masü saka menünger adokba osangkaketbo osangkaketsa tenüngdakba akümer. Item ajakji asadanga, ano tanü nungi nübortemi Tir Yimyim teka nung amer azüngtsüsa asentenshia tenzükra, iba jagi Tir Yimyim-a tajungba adoktettsü aser asen nebortema tali telongjemba akümtsü. Joko, osangkaket adok tenzükerbo osangkaketji nübor meyong, anungji nübortemi pei meyong osangkaketa ta bilema tajung-tamajung ajak tokdena Tir Yimyim nung lemsatepra, asüngbo Tir Yimyim ya osangkaket dang masü saka kaketreju amai ka akümtsü. Atangji, taoba küm 21 tashi nenok teyari aser temoatsü nung aruogo, aser ano kasa temoatsü nung iba osangkaket ya tajungba – tajungba adoka aotsüsa asenok ajak sarasadema mungdi.