Tasü Mait Tasü Itdaktsüba (2 Korinth 12:7-10)

“Nenok shisa buluba ajak Pa dak yuang, kechiaser Pai nenok asoshi anebalur.”  (1 Peter 5:7).
Satani Tsüngremer nübur anema amshiba nok-o-nü tajungtibaji tasü maitji lir. Tejen aser Tasen Lai nung temeshi nisung shingaia iba nungi mejenbutet. Aji oda mesüra Elijahi Carmal tenem nung takok ngur, tananübuba juniper süngdong kübok tasü meiti akümba nai koda rasaa shitet?
Tenyar Pauli Tsüngrem nungi jungkai adokba aika angu saka pa temang nung ayi ka asoshi shisabulua liasü. Pai iba dang “Satan nungi tenyar ka” pa dak azüktsü yok ta ashi (2 Kor. 12:7). Pai ibaji indoknü. Pai ibaji asoshi pai maneni sarasadem. Paul nungi iba ayiji indoktsütsü melen iba den pa tali tashi itdaktsü. Ibaji tejashitsü ka liasü, saka Tsüngrem taochi ajanga iba tejashiji tepela agi melentsü (t.9,10). Satani tanaben tamakok angu. Paul temulung makai tasü meiti maküm, saka pai tepela agi pungtena ashi, “Kodang ni tashi maiter, idangji ni tashi ita akümer.”
Tesüiba pututem nung takümji kanga tongmelang liasü. Asenok tang scientific aser technological tejakleni aoba putu nung alir. Tang asenok teyari lemang aika angur. Takümji timtem. Saka tatembang nung takümji shisabulu aser tebilemtsü agi sünga lir. Asen tetsü tebou mapang nung maliba tashidak tapu balala tanü adoker. Satani item ajakji Tsüngremer nübur tasü mitdaktsütsü asoshi inyaker. Saka Laishibai asenok yashi, tanü aser asüng shisabulu ajak indoktsü telangzüba agütsür kechiaser Tsüngremi asenok asoshi anepalur. Aji oda mesüra asenok tsükchir shiba molusongzü ama shiba meyoktettsü bushia senzür pa sang nung asenok aputsü (1 Peter 5:7,8).
Aji saka sarasadem agi tebilemtsü ajak bentettsütsü aser timtem ajak nungi kümzüktsü ta menangzüker, saka iba yagi Tsüngrem taochi koba angatettsü makok aji nangzüker (Fil. 4:6,7). Ibai Kibuba tepela koba Satan tashi noktangtsü asoshi ne tashi aküm. Na ama temeshi nisung timatemba metetbaji, na asoshi tashi itdaktsüba ka lir (1 Peter 5:9). Shisabulu agi na shisa mebuludaktsü tashi shisabulu lir!
Telumi, mesüra tetsübu; Pa teka anasa lir; Pa memelenshir aser Pa temeim lir, Tamang dang amangang aser nai angutsü. Khrista ne dang ajak lir!
(John S.B. Monsell, 1811-1875).