Tasüba temerenshiba agientsü tebilemba mali

New Delhi, July 31 (Agencies): 1993 küm Mumbai amakba ken o nung kiralongrar Yakub Memon alenseta südaktsüba onük nung o atsütep/toktepba mapang ka nung Hokolbar nü sorkari, temerenshi tulutiba (tasüba temerenshi) agientsü tebilemba mali, ta metetdaktsüogo.
Yashi Memon alenseta südaktsüba sülen ano maneni asentenshir tasüba temerenshi onük nung o atsütep tenzükogo. Tasüba agi merenshiba ajanga tangar asoshi tansütsü ka agiteter asü (?) ta asüba olen nung yimtenren lenirtem nungi tenzüker tilaba tashi pei tangatetba balala lir.
Brihostibar nü Congress lenir Shashi Tharoor-i twitter ajanga, sorkari nisung meimchir ka alensetogo ta osang angashia jashir, ta shiogo. Tasüba agi merenshitsü obendang agütsübaji paibo anemer, ta paisa shisem.
Ano CPI(M) lenir Sitaram Yechury-ia, tanga linüktem ama India-ia tasüba agi merenshiba ya agientsüla, ta ashi.
Ano külen BJP lenir Shahnawaz Hussain-i bo, Menom tepsetbaji tim dang, “Mumbai amakba lendong nung asürtem dakji kechi tai liasü (?) Ozüng ajanga, aibelenertem merenshitsü aser tai maketertembo memerenshitsü asoshi inyaker,” ta ashi.