Tasümang 8 aremtsü atema Manipur Angh-i JAC dang mepishi

Imphal, April 09 (Agencies): Manipur nung Inner Line Permit (ILP) bill onük dak sentakba nung longkak aitertem aser sorkar tsüngda mepetmesü maneni adoka aliba mapang ka nung Deobarnü state Angh, Najma Heptulla-i Joint Action Committee (JAC) dang tasümang ayudak longkak aiter tasümang ti yua alibaji tama aremtsü temelaba agutsüdaktsüner, ta mepishi.
Sorkari bill asem agizükba anema yaküm Churachanpur nung longkak aitdang rara adoka longkak aiter nisung teku tashi süa liasü. Item bill asemji tribal anema lir, ta longkak aitertemi ashir.
Tasümang tibo Churachandpur nung aliba district hospital indang ‘morgue’ nung tang tashi yua lir, aser tasümang kabo yaküm kinüngertemi bener ao.
Longkak aitba telok, JAC aser state sorkar tsüngda Chief minister tasenba, N Biren Singh den Hokolbarnü senden mena liasü. Iba senden nung telemtetba tajung karbo agiogo ta osang angazüker.
“Anti- tribal bills onük nung sorkar aser JAC tsüngda telemtetba tajung ka dangi arutsü atema sorkari inyakba aser JAC lenirtem den ken o jembitettsüsa lemtetba angashia ni pelar,” ta lai ashiba Imphal Raj Bhavan sangdong ka ajanga metetdaktsü.
“Ken o jembiba ajanga onük kecha mebentettsütsüsa mali,” ta sangdong nungsa shia lir.
State Angh-isa, “Ni ajak dang, talisa JAC dang tamangba yimsü dak sendakba asüpila sentong agia tasümang ajakji aremtsü atema temelaba agutsütsü ni mepishir,” ta mepishia metetdaktsü.