Tasümang aremtsü lemtetba sülen Manipur nung tensa mejungi lir

Imphal, February 12 (Agencies): Yaküm September ita police-i injang yokdang kahseta tai tonglokja aliba lisopur tasümang 9 aremtsü lokti tentet anati telemtetba agiba ajanga Hokolbarnü Manipur, Churachandpur district nung tensa mejungi kümogo.
Tasümang 9 tanü tashi nung anogo 165 buba ‘morgue’ nungdang yua lir.
Osang ajanga ashiba agi, United Peoples’ Front (UPF) aser Kuki National Organization (KNO) nati tasümangtemji aremtsü lemteta liasü aser state sorkaria iba telemtetbaji junger ta agizük. Ajisüaka iba anema ketdangsüa lungkak aiter Joint Action Committee-i, parnoki maneni takhangba agüja aliba nungi matsüngshir, iba den külemi land bill den ‘tribal martyrs’ ken o nung mezüng lateta aliba nungi matsüngshir, ta metetdaktsü.
Tasümangtemji February 13 nü aremtsü ta tentettemi lemteta liasü, ajisüaka lisopur kari tasümang ayuba tesem ‘morgue’ ji longbanger nisung shinga marudaktsüi nokdanga lir.
Lenden nung alirtem, Meitei nungeri Inner Line Permit (ILP) tanaben benoktsü akhangba sülen iba atemaji August 31, 2015 nü Manipur Assembly-i bill asem agizüka liasü. Item bill asemji Manipur Shops & Establishments (Second Amendment) Bill, 2015, The Protection of Manipur People Bill, 2015 aser Manipur Land Revenue & Land Reforms (Seventh Amendment) Bill, 2015 lir.
Bill asem agizükba anogo sülen tasüngji (September 1) tenem nung aliba district 6 nüburtemi bill asem anema Churachandpur jila nung lungkak aita liasü.
Hills district nüburtemi ashiba agi, item bill ajanga state sorkar nung Meitei nunger teimba asütsü. Iba den külemi akhi mapang nungi parnok ali temeten bener aoba dang masü saka tesülenbo parnok maitsü-a samatsü.
Lungkak aitba mapang police-i lungkak aitertem dak injang kahloktsüsang arishi küm 11 tebur ka densema nisung 9 kahset ta tai tonglokja lir. Iba mapang nungjagi tenzüka lungkak aitertemi, Manipur sorkar dang bill asemji agientsü akhangba densema parnoki akhangbatem mataloktsü tashi tasümangtem maremtsü, ta lungkak aiter.

You must be logged in to post a comment Login