Tasütama ajurudang teinyaktsü mapa ka

– A. Maong Aier,  Retd. G/T Alongmen ward, Mkg.

Tasü tama ajuruba ya alipokdang nungi ajurua aru, aser iba ya Yisu maru tashi ajurutsü. Iba ama atalokdang koda yariteptsü aser koda tembangtsü, item ajak asen sobaliba agi melaba ama inyaka odagi. Iba ama atalokdang mapa ka nung tang tashi mait ajiteta ni kü o tatsü agi yamai lemsateper.
Asen Ao kin ya mapa ajak nung lenir tajung ka lir. Sürabang tatishitsü agi, Mokokchung mesüra Dimapur jila nung nisung ka sür leper mesüra yimtsüng kati bener aodang tasümang abenba talongtsü nung amenertemi asür ken medeni azüng azünga aoba ya kanga dang majung. Iba ya ajanga asen kin merah meketdaktsür. Ano tasür kenji temulungjang agi atentsü makokba ajanga la-la agi tenyonga aoba angashir aser angur. Iba ya ajanga asen Ao kin iba tashi ya na, ta temulung yirudaktsür. Yimya agi tasümang abenba talongtsü nungji asangur dang amener, parnokia asür kenji temulung agi koka maliyonga kensübo shia lir, anungji asangurtemi asür ken ya anasem shibo temulung agi koka alitsüla. Tang nungibo tasümang abenba talongtsü nung tebur tain kenten ashir asem pezü kabo densema asür kenji longsolongsoa tenyonga ao nung kanga dang ajungtsü. Tasümang bener aodang angatsü (tangatsü) ajungba ken ana danga akhi ken kaket nung aliba ama tongmelang agi zülu tulu agi type nung ajener tu 20 jika alitsüla. Iba jagi tuluka yaritsü. Saka ni mezüng ashi ama kenji temulung agi kokra kanga dang ajungtsü. Samaro teloki ken 300 tashi temulung agi tenteter, süra asenokbo koda? Yimtsüng shia nung leperi tasümang bener aodang ken tena meinoktsüba ya kanga dang junger. Ano akok nungbo ken kaket meinpronga mebenshi temulung agi tentet nungbo kanga jungla. Anungji tang nungi danga ni ashiba ya inyaktet nungbo asen kin ya kanga tang merah ketla ta nübur ajak den kü tebilemba tatsü agi lemsateper.