Tata Motors-i passenger gari nung jenjang atutsür

New Delhi, December 12 (Agencies): Tanga nungi oset bener arua inokba nung jenjang teimba akümba ajanga taruba ita (January 2017) nungi passenger amenba garitem jenjang senpak 25,000 agi teimba akümtsü.
January 1, 2017 nungi tenzüka passenger amenba gari model balala nung senpak 5,000 nungi 25,000 tashi atutsü, ta Tata Motors sangdong ka ajanga metetdaktsü.
“Steel, aluminium, copper aser rubber oset nung jenjang teimba akümba ajanga onoki yangluba passenger gari nung sen atutsüsa akümer” ta Tata Motors (passenger vehicle business) nung Tir, Mayank Pareek-i ashi.
Iba company-i yangluba garitem nüburtemi kanga sapua akümba den külemi tesüsa sayaba gari, Tiago sapur tali züinba angur, ta paisa shisem.
Tata Motors-i Nano ama gari tila, tang tasen sayaba Tiago aser Aria garitem sen jenjang 2.18 lakh nungi 17.29(ex-showroom Delhi) agi yokdar.
Renault India-i yangluba garitem taruba ita nungi sen jenjang asemsü agi timba yong ayoktsü ta Deobarnü metetdaktsüogo.
Toyota Kirloskar Motor(TKM)-ia taruba ita nungi parnoki yangluba garitem nung sen jenjang asemsü agi timba yong ayoktsü osang sangdongogo.