Mumbai, September 02 (Agencies): Direct broadcast satellite television provider, Tata Sky-i TV nung aruba sentongtem menüngoka yutetba set-top box (STB) tasen ka nung tangoka aliba noksa/film tem smartphone aser tablet tem nung internet data melalui reprangtettsü asoshi Wi-Fi dongle dener Mongolbar nü sayaogo.
Iba ya India linük nung ibala mesükba technology rongnung mezüngbua lir.
“Iba STB tasenba nung 500 GB memory keta lir aser Wi-Fi dongle dena sen 9,300 agi talitsü angutsü. Iba oset ya metro aser Tier-i yimtitem dak rangloker yangluba lir. Tesüiba mapang ama iba oset yaa nüburtemi saputsü onok teimla lir,” ta Tata Sky nung chief commercial officer Pallavi Puri-i ashi.
Tata Sky ya Tata Group aser 21st Century Fox na den senteper 2006 küm amenok aser tang tashi nung Tata sky amshir million 14.5 kümogo.
“Linük nung internet amshir noklang nung shilem 75 tashibo arishi küm 19 nungi 35 tetsüngda nung alirtem lir aser parnoki anogo shia langka tasen karbosa yimlaa mobile ajanga internet amshitepba tensa ka nung Tata Sky-i iba STB tasenba ya sayar. Anungji kong nungi südir süaka nüburtem taginübaji Tata Sky plus Transfer ajanga broadband mamshii agütsütettsü,” ta Tata Sky nung managing director aser chief executive Harit Nagpal-i ashi.
STB tasenba nung Tata Sky app enokja aliba ajanga tamshirtemi TV nung aruba sentong tem menüngoka yur mashi mapang nung reprangtettsü, ta company sangdong ka ajanga ashi.
Iba STB nung enokja aliba app ya Apple aser Android nunga lir.
Saka STB tasenb ya sen kanga tasak ta ashiba mapang Puri-i, “Talirtemi yangji keta aliba ajakji meteta aküm nungbo jenjang kanga temela amai bilemtsü,” ta pai langzüba mapang, tang Tata Sky tamshidak alirtema tasenbai upgrade asütsü maongka lapoktsütsü ta shisem.
STB tasenba nung aliba app ajanga taoba mapang nai mereprangai süidaktsüba episode pongu tashi meyiba oa reprangtetsütsü, ta company-i ashi.
You must be logged in to post a comment Login