Tata Sons dang Japan NTT DoCoMo nem $1.17 billion temonok agütsütsü shiogo

Tokyo, June 24 (Agencies) : Tata Sons-i Japan nung mobile phone yanglur tulutiba den tezüngzüktep raksaba atema sen billion dollar 1.17 temonok agüjang ta tetuyuba agütsüogo.
India den lokteper inyakba mapang sen tsütsü tetsükdaktsü adokba ajanga London Court of International Arbitration ajanga iba o lepdang ya agütsü, ta Japan DoCoMo company-i sangdong ka ajanga metetdaktsü.
November 2009 küm DoCoMo noklang nung shilem 26.5 stake Tata Teleservices nem sen crore 12,740 (share shia sen 117) agi agütsü. Ajisüaka iba service tamshir kanga maliba ajanga April 2014 nung par company-i lokteper inyakba anentsü telemtetba agi.
Küm pongu sülen parnok lokteper inyakba anenaka DoCoMo-i 2008 küm inokba senji tajemba agi noklang nung shilem 50 bo meyipa agütsütsü tezüngzüktep agir liasü.
Tata-i Japan telecom tetsüti meyong noklang nung shilem 26.5 stake takoksa aludaktsüba atema DoCoMo-i Tata dang nungi share shia sen 58 mesüra sen crore 7,200 meshia January 5, 2015 nü court nung ken o benok.
DoCoMo-i, “June 23, 2016 nü London Court of International Arbitration ajanga Tata Teleservices (TTSL) dang onok nem temonok agütsütsü tetuyuba agütsüogo,” ta ashi.
“Tata Sons-i tezüngzüktep raksaba atema DoCoMo nem USD sen 1.172 billion temonok agütsütsü atema court-i shiogo,” ta DoCoMo-i sangdong ka ajanga metetdaktsü.
Onok dangi temonok agütsütsü osang aruogo aser tang iba osangji kanga junga asadangdar, ta Tata Sons-i sangdong ka ajanga metetdaktsü.
“Iba dak sentakba nung tang tangbo onoki aika meshitettsü,” ta Tata Sons otongdari sangdong ka nung ashi.
TTSL ket nung DoCoMo meyong share aliba ajakji Tata Sons-i telok mesüra nisung kar bushia benloktsütsüla, ta Court-i obendang agütsüba nungji shia lir.
Tata Sons-i onoki nem temonok agütsütsü asü magütsütsüar ashitsü makok, ta DoCoMo-i sangdong nung shia lir.
“Iba sangdong agütsü tashi nung Tata Sons-i temonok agütsütsü magütsütsü mesüra TTSL indang share kodang agütsütsü item osang ano mejangjateti lir,” ta kasa sangdong ajanga ashi.
Iba mapa nung 2014-15 nung TTSL sen crore 3,846 akoksaa lir.