Tatala Aremzükba

~ T. Ken 119: 17 – 24.

Nisungtemi na ataladang nai kechi inyaktsü ? Temeim mesayuteter telok nung na alidang , talisa Tsüngrem O nung mamangertem telok nung na alidang, parnok o temji ne koloki air idangji nai kechi inyaktsü? Ken züluri telangzüba ka agütsür: “Ano tongtipuri ni anema tasa asaa menaka, ne tenzükeri ne telatet ozüng indang shisadangtsü. Ne kulitem ano kü tepela aser kü teshisadangertem lir” (t.23,24).

Tsüngrem O nung shisadangang. Tsüngremi kechi ashir aji ne kolok nung yuang. Tangari ashiba mapatem indang asenoki bilemra aser shisadangra, asenok meinprongtsü aser jashitsü. Saka asenoki Tsüngremi ashiba ochi aser shidak aser temeshi aser tobur tajung mapatem nung shisadangra, Pa tesünep agi asenok süneptsütsü; asen mulung sünga alitsü.

Tsüngrem O nung pelaa liang. “Ne kulitem ano kü tepela aser kü teshisadangertem lir” (t.24). Kari miim o jembiba nung jangra atemer. Parnoki tangar olulu jembiba nung jangra atemer. Saka ken züluri ashir, “Parnoki miim o jembia alidang aser tiyazü jembia alidang, ni Tsüngrem O shisadanga liasü, kechiaser ni iba nung pelar.”

Tsüngrem O ji tashi angang. “Ne kulitem ano kü tepela aser kü teshisadangertem lir” (t.24). Iba tetezü, “kü dang tsüngi o ashir.” Tashi menden nung alirtemia, tembartem aser tsükchirtemia na aginütsü. Saka Tsüngrem O nungi nai tsüngi o agiang.

Tanü kechi timtemsa lidir liang, Laishiba dangi meyipang aser iba jagi na tsüngidakjang. Iba yagi ne kolok, temulungjang aser temulungtetba yimsadakjang.