Tatar senden mesüka kümogo

Nagaland nung tebilemtsübo jembir mejembima saka tatar senden nungbo kecha tejembitsü maka amato yaküm küm Nagaland tatar senden minute 15 dang mener senshiba to tatartemi nübortem timtem aser parnok nüngdak kecha hau ta maliba tamaitsü liasü. Iba amaji alima nung timtembo lir ser nung mali ama yimsüsürtemi yimsü asüba agi ita junga government office lapoka mapa meinyaktettsüsa akümba tensa mapang tamajung ka Nagaland nung alirtemi ajangshiogo. Ashi, alima nung nübortem nüngdakba aser parnok timtem ajak reprangteta tatar senden nung parnoki meteta süoka jembi asübo, timtem takoksa patekatobo matalokla ta bilemer. Tatartem ya nübortemi nübortem asoshi ken o jembitsü aser panok nüngdak reprangteta anepalutsütsü shimtet. Ibaji dang masü saka tatartem senden amenba ya angati amener masü saka parnok senden nung amenba anogo sen taa lir aser ano iba denji oliora aser tanga nüngdak asoshi nübortem meyong sen agütsür. Item senji agia nübortem timtem mereprangtsü aser nübortem nüngdak mejembitsübajibo atamata mezüngmeshi masü. Aji oda, tatar senden minute 15 nung temadokbaji Nagaland nung alir Naga nunger asoshibo alima tatem atonger ama teimla samar alidang, tang yakanü nungi tenzükba tatar sendenbo ghonda trok junga mena ken o süoka jembiba angashiba jagi Nagaland sür aliba shia aru amai bilemer aser tangang Nagaland nunga tatar senden alir kümogo. Atangji, tatar senden nung tejembitsü makabaji department kecha nunga government maparen indang shingaia kecha masüngdangdaktsüner, kechiyong asüngdangra miima inyakba ajak ashitsüsa akümtsü aser nübortemi metettsü. Anungji, miimshia inyakba meputetdaktsütsü atema tatar senden aritepa tembanger senshitsü meranger. Ibaji talisa tatar senden nung opposition maliba ajanga lir. Ajisüaka, Naga nunger tia ajung, tatar senden nung opposition mesüaka, BJP telok nungi adokba MLA Mmhonlumo Kikon-i Nagaland nung tongtibang department Home, Food & Civil Supplies aser Schoo Education ama nung nübortem asoshi inyakbaren metetnüa asüngdangba ajanga tatar senden nung item department shia nungi minister-temi telangzüba agütsütsüsa akümer. Ibaji asoshi Naga nungertemi Mmhonlumo Kikokn dang pelatsü tim. Aji oda, Kikon-i asüngdangba langzüdang, Home minister Y.Patton-i taoba küm pongo tsüngda pa Home minister asüdang nübortem nem yimjak nung kecha memetetdaktsüi miima police 2000 ( meyirijang ana) dak tali shimogo ta metetdaktsübaji taoksatsüka lir. Pai ashiba agi, police-tem shimtsübaji kanga rongdak nüngdaker aser mapang maliba agi osang kakettem nung ‘advertisement’ kecha magütsüi aritepa dang shim. Home minister telangzüba angshidangji yamaji küm pongo tsüngda sepai meyirijang ana nübortem nem memetetdaktsüi aritepa shimtsüsaji alima kar den raratsüsa ‘war’ adok asü koda (?) ta bilemer. Asenok army aser para-military force nung aitsü asoshia parnoki osangkakettem ajanga tejangrar lanurtem ajaki merangdangtsüsa jelia osang metetdaktsür. Ibayongji tesem ajaklen nungi post ishika atema nisung meyirijang dak tali adenshia merangteper aser panrok rongnung tetemsütiba aser tajungtibatem shim agir. Ajisüaka, Nagaland nung metendangi police shimba jagi tejangrar tetemsü lanur aika ashioktsüba dang masü saka teshimertemjia kechi komaka jenjang ka nung shimokar temulung malemtsüsa mapa aika lir. Aji oda, tatidang magi meiima shimba sepaitemi pei linük kechi koma tenzüktsü ta asübaji shisabolutsüka lir. Iba amaji advertisement magütsüi mapa memetet ser shimba jagi Nagaland department aika shirangdagi. Iba amaji meshirangdaktsüi Nagaland shia arudaktsütsüla aser iba atemaji tatar senden nung nübortem ajangzükdaktsütsü asoshi ken o asüngdanger parnok ka anaji nübortemi aser lokti tentettemi pusema yimjak nung ayimtentsüla. Aji oda, minister kati nübortem nem memetetdaktsüi pei mulungba nung yamaji inyakertem shimpet shimer aser nübortemia ola madoker ta odaktsüra, asüngbo Nagaland government alitsübaji nüngdak maka akümtsü !