Tatari nübortem asoshi tatar senden nung jembitsüla

Dimapur, June 13 (TYO) : Nagaland nung yimsüsür tatar kati nübortem asoshi inyaktsüla ta bilemba onüktem osangbenertem den dang masü saka tatar senden nung benoka jembitsüla ta tanü NPF Women Wing sangdong ka ajanga metetdaktsüogo.
Yashi Nagaland nung Independent MLA Wb.Thomas Ngullie-i Nagaland nung ozüng alema bendangertem arua melidaktsütsü asoshi state sorkari mapa ka tenzüktsüla aser Naga yimten tebilemtsü onük latettsü asoshi temulung agüja inyaktsüla ta osangbenertem ajanga sangdongba onüktem nung telangzüba  agütsüba sangdong ka nung NPF tetsürtemi iba osang ya metetdaktsü.
“Wb.Thomas Ngullie-i asen lima nung ozüng alema bendangertem arua aliba tebilemtsü indang jembibaji junger saka iba ama tongtibang onükji osangbenertem den dang masü saka MLA ka ama tatar senden nung benoka jembitsüla, ajisüaka tia majung kaji pai tatar senden nung madener,” ta NPF tetsürtemisa aija metetdaktsü.
Naga yimten onük nunga NPF tetsürtemi MLA Thomas Ngullie dang Dimapur o Delhi na tsüngda senzütsü melena pei constituency-i orr nübortem den Naga yimten tebilemtsü onük latettsü asoshi tangatetba agüja shisalemsateptsüla ta parnokisa ashi.
“Thomas Ngullie-i pasasa pa aitsütsü melen terenlok mapa meinyaktetba atema nübortem dena aitsür. Pa ya tang alir MLA-tem rongnung senotsü aika endoka jangratema aliba MLA ka asütsü, kechiyong aiben pa Delhi nung star hotel nung dang anener aser Nagaland nung alidang Rio Villa, Niathu Resort aser Hotel Vivor nung amonger, anungji pai par nübortem ajurutsü asoshi angüma melutettsü” ta NPF watsütemisa aitsü.
Thomas-isa Chief minister, T.R.Zeliang tazüngba kuli shitak sayutsüla ta maneni akangba onük nung, “iba ken o ya okadak lir asünungji, ozüngi dang bendangtsütsü,” ta parnokisa ashi.