Tatartemi Myanmar aser Laos semdang

Dimapur, August 28 (TYO): Planning & Co-ordination, Land Revenue and Parliamentary Affairs Minister Neiba Kronu den Advisor tem- Namri Nchang aser Dr. Longrineken nungertemi Myanmar aser Laos linüktem semdangogo.
August 19 nungi 27, 2019 tashi parnoki Myanmar nung Coffee plantation aser Laos nung Tourism & Infrastructure promotion repranga senzüa liasü.
Myanmar nung opium lu ayimba anendaktsütsü atema United Nations on Drugs & Crime (UNODC)-i coffee lu ayimtsü ajungshia yari. Shan tenemlen coffee luji mezüng ayim aser tanü iba tesem nung coffee lu ayimba ajanga nübortem tajangzük jenti angur, ta OSD Planning and Co-ordination, Thomas Thailu-i sangdong ka nung ashi.
Nagaland state rongsenkettsüng jenjang renlokdaktsütsü tangatetba nung Kronu-i anir telok jagi Sithar coffee plantation area semdang aser idakji Executive Director den ajurutepa sensaksem.
Idangji Minister Kronu-i Tin Tinwin dang Nagaland nung coffee tsünüba nung yariteptsü atema mepishi.
Laos nunga parnoki coffee plantation aser tourism & infrastructure indang osang metettsü atema parnoki sema senzü.
Laos nung Kronu-i anir teshimtet telok jagi UNESCO Town Luang Prabang semdang. Iba jila ya United Nation for Educational and Scientific Organization (UNESCO)-i world heritage kübok anepalur.