Tatem maka Taküm

  R. Temjen Imsong Ex. Pastor
Naga United Village, Dimapur

         (Tamendakdak Lai. Yoh 3:16, 36. Yoh 5:11-12)
1.    Na temenen nung samaa lir, Molumi ne shilem.
2.    Na samaa aliba kümzüktsü aser teti taküm agütsütsü, Tsüngremi Pa ajaso chir alimai yok. Yoh 3:16
3.    Taküm ka tesama tasü aser Molumi melen teti taküm Yisu ajanga agütsü. Yoh 3:36. 1 Yoh 5:11-12.
Tsüngremi Laishiba agütsüba nükjidongji itemi kuli ana :-
1)    Yisuji khrista Tsüngrem chir ta amangtsü asoshi.
2)    Yisu dak amangra teti taküm angutsü asoshi.
Yisuji Tsüngrem chir ta nenoki amangtsü asoshi, aser amanga pa tenüng nung taküm angutsü asoshi o itemi zulu. Yoh 20:31. Iba nükjidong ana yagi asenok nem tangatettsü ka teyur (NA TETI  TAKÜM MAKA) takoksatsü Tsüngrem O-i ashir, kechiba ?
Ajaki temenen menaogo Rom 3:23. Temenen nisung ajak asütsü Laishibai ashir, temenen taa tasüba. Rom 6:23.
Tannela kobai temenen menar asütsü.  Ezekiel 18:4.
Tsüngrem O i ashibaji nai mamangtsüa akok, küm aika nai angashiogo aser züngdanger alitsü. Naia kenbo iba Tsüngrem O ya sayutsunger alitsü, saka na teti tatem maka taküm Yisu nungi mangu amanger. Nai mamangba agi Lai O mataloki malitsü, Tsüngrem O ochi aser taküm ya ataloktsü. Laishibai ashir, Anüng aser ali süitemtsü saka kü O mesüitemtsü. Mark 13:31.
Yimsüsür Nikodimai Yisu dang teti taküm angtsü asüngdang, Yisui langzü (Na tanaben soang. Yoh 3:7)
Tepuokeri Paul dang kümzüktsü asoshi ni kechi inyaktsü tim (?) ta asüngdang,
Pauli ashi, Kibuba Yisu dak amangang, na aser ner kibong kümzüktsü. T. Mapa 16:30-31.
Yisui ashi ni nenok nem teti taküm agütsür. aser nenok kodanga mesamatsü Yoh 10:28. Yisui ashibaji ya, tamasa Tsüngrem yimli aser pa temeshiba bushiang, aser item ajak nenok nem bendenloktsütsü. Laishibai ashir, nenok temenen jakjaa meremaka itemji rujep ama mesüngtsü, azü ama meremaka tezüng ama mesüngtsü. Isaia 1:18.
(Ya metetang)
1.    Na temenen nisung. Rom 3:10-23.
Na tasü lir. Rom 6:23.
Molumi nung teti tatem maka alitsü. J.Adok 20:14.
Na kümzüktsüla, saka nesasa mekümzüktet. Tekumzüker ka tenüngdaktsü,
Na tanela nung shiranga lir, Doctor ka tenüngdaktsü.
2.    Tsüngremi na meimer. Yoh 3:16. Ne dak aliba temenen Tsüngremi sempar, saka pai na meimer, na kumzüktsü pai pa chir Yisu na melen kangki nung südaktsü.
3.    Tsüngremi na mesamadaktsüner. 2 Peter 3,9. Mt.18:14.
Yisu alimai arubaji na asoshi osang tajungtiba. Luk 2:10
4.    Yisui dang na kümzüktsü akok, pa ne melen asü, anungji pa dak tang teti asoshi ne tekümtet lir. 1 Peter 3:18.
Yisu ne menen yong kangki nung angenlok, nai tang pa amangtsü asü ? Tsüngremi ne menen adoktsü aser mebilemtettsü. Isaia 43:25. Ibri 10:17.
Yisui asenok nem temenen aser tasüba melena, tadok aser teti taküm agütsütsü, Laishibai ashir, Yisuji Tsüngrem chir ta shibai amanger pa alema alima akokba shiba lir ? 1 Yoh 5:5.
Anogoshia ne jakdang itemi yuja kar :-
1.    Taküm aser tasü.
2.    Temoatsü aser atakatem.
3.    Tajung aser tamajung
Ne jakdang na shimnütsü shimtsü yuja lir. Taz 30:15, 19. Ne shisatsü, ne kolok aser temetetba tajungtiba amshia shimtetang. Tsüngremi mulungba ka dang lir. (TAKÜM SHIMTETANG) Taz 30:19. Tsüngremi asenok nem teti taküm agütsü aser iba takümji Yisu Khrista lir. Shibai pa agizükogo pa teti taküm kar, shibai Yisu magizük pa taküm maka. 1 Yoh 5:11-12.
Na Yisu aka asü maka ? Nai Yisu ne taküm nung kibur ta agizüker asü magizüker ? Lai ashir Tsüngrem terasaba ne tangi arutsü, taküm kaket nung zulua mungura pa molumi nung puoktsü. J.Adok 20:14. Teti tatem maka taküm Yisu dak lir, ya makaibo shinga kotaki aotsü makok. J.Adok 21:27. Nai taküm aginüra takümji Yisu dak lir. pa nungi agitsü akok. Aser tajungtibaji pai ne nem agütsütsü. Laishibai ashir, Tamasa Tsüngrem yimli aser pa Temeshiba bushiang aser ajak ne nem agütsütsü. Mt.6:33.
Nai taküm linura Yisu agizükang, aser pa dak liang.
Na taküm asü tasü agitsü ?
Yisui ashi, Meshiang aji nenok nem agütsütsü, bushiang aser nenoki angutsü, akoshiang aser aji nenok nem lapoktsütsü. Mt.7:7.
(Yisu nungi teti tatem maka taküm agiang).

You must be logged in to post a comment Login