Tatembangbuba tongbangji Chhattisgarh nung raratsü: Raman

Raipur, April 29 (Agencies): Chhattisgarh Chief Minister, Raman Singh-i, Maoists anema tatembangbuba tongbangji Chhattisgarh nung raratsü, ta ashi.
Paisa, Bastar tesem nung terenlok mapa inyaktsü atema tesünep mali tashi sorkari süngjema malitsü, ta ashi.
Tawa Sukma district nung Maoists telungpurtemi CRPF sepai 25 tepsetba dak sentakba nung Chhattisgarh legislative assembly nung o lemteptsü atema Congress-i benoka liasü, aser iba senden nung Singh-i, “Linük nung Maoists anema tatembangbuba tongbangji Chhattisgarh nung raratsü. Bastar tesem nung telungpur maneni mita aotsü aser nüburtem atema Bastar nung tesünep bener marutsü tashi state sorkari animesüngzüktsü,” ta ashi.
“Maoists-i terenlok mapa tsübur. Parnoki gari lenmang, apo, anema-alibaren aser shisaliok nung terenlok tsübur, ajisüaka Bastar nung lenla ajak nung terenlok alitsü atema sorkari inyaktsü,” ta paisa ashi.
“Sukma kübok Burakpal nung tatalokba ya tejashitsüka lir, kechiyong asen tasütait sepai aika süogo,” ta paisa ashi.
“Telungpur anema inyakba dak sentakba nung sorkar mapatongji tejangja. Kiralongraba aser telungpur mapa nung atsü-anem makatsü. Democracy kümzüktsü atema onoki raratsü,” ta pai ashi.
“Sukma-Doranpal-Jagargunda sendaktepba kilometer 57 gari lenmangji central aser state security forces senteper inyaker. Bastar kübok item lenmang yangluba kümzükdang asen sepaitemi taküm tenla agütsüogo. Ni parnok nem akhüm agütsür,” ta paisa shiesm.
Iba senden tenzükdang Congress legislative party lenir, TS Singhdeo-i, sorkaribo Bastar tesem nung Maoist tebilemtsü ajema akumer ta jembir, ajisüaka mapang shia sepai jenti asür; Police intelligence tashimait kümogo aser anogo 46 tsüngda Maoists-i anaben tashi sepaitem amakba ajanga police tashimaitba sayur, ta aija liasü.