Tatidang magi shimba tenzükertem regular mesütettsü

Dimapur, March 01 (TYO) : Nagaland sorkar kübok Veterinary & Animal Husbandry department nung Nagaland Public Service Commission (NPSC) ajanga tatidang magi shimba Veterinary Assistant Surgeon (VAS) 13 mapa regular kümtsür alibaji metentsüsa temzüng ozüng nung kecha shia mali, anungji parnok regular sütsübaji agiena atar ta High Court, Kohima bench nung obendanger N.Chaudhury-i metetdaktsüogo.
Iba obendang ya Unemployed Veterinary Graduates Association purtem tenüng nung Atouzo Pienyui okadak agütsüba ken o angadangba sülen obendangeri agütsü. Iba obendang agütsütsü asoshi High Court, Kohima bench nung obendangeri Supreme Court nung Umadevi case nung obendang agütsüba indang ashidang, ” Mashilen nungi sorkar mapai aita alirtemji nemji kecha temeten agütsütsüsa madoker, anungji parnok regular sütsüba mapaji linük temzüng arla 14 aser 16 anema inyakba asütsü,” ta metetdaktsü. Anungji iba obendang nungji ajemdaker, High Court, Kohima bench nung obendanger N.Chaudhury-i Nagaland Veterinary & Animal Husband department nung NPSC majangi tezülen nungi shima aliba Veterinary Assistant Surgeon 15 nungi 13 regular sütsüa aliba order-ji agientsür ta metetdaktsü.
Iba obendang agütsüba sülen, Additional Advocate General, Nagaland-i Commissioner & Secretary, V&AH department dang High court nungi agütsüba obendangba anema nokdaktsübaji kuli tajung mali ta metetdaktsüogo.
High Court nungi iba obendang agütsüba ajanga Nagaland sorkar kübok tatidang kecha magi tezülen nungi shima alirtemji shinga regular masütsü ta kümogo ta tanü ACAUT sangdong ka nung metetdaktsüogo.

You must be logged in to post a comment Login