Tatidang magii shimba

Nagaland junga merenloktetba timtem tenzükdak aika rongnung kaji sorkar mapa nung inyaktsü atema tatidang magii tejak repranga mesüra sübokrem agir shimba mapatem ya asütsü. Kodang nisung ka metendangi mapa nung aniokdir, pa mesüra laji temsüa ali mali memetetbaji dang masü saka temsüa alir lanur tajung aika tezüdangdaktsür. Iba jagi temsüa malirtem mapa angudang, temsüa alir mapa mangur. Tanü asen lokti nung tebilemtsü adokba deraji aji lir. Aji oda, office ka nung tulurbo tulur anungji sorkari ita sen tajung den gari dena agütsür, ajisüaka pai mesüra lai tezülua junga mashi, tejembia junga mejembitetter aser tangari zülur agütsübaa junga mangatetter ta süra pa mesüra laji timatemba dang masü saka nübortem akoksar asütsü. Office nung computer amshitsü shim saka shimer külenang computer angazüki aotsüsa kümra, shiba akoksatsü ? Kaketreju nung sayutsü shim saka tanurtem dang lesson sayutsü mekokra shirnok akoksatsü ? Mozü kidang shiranger anepalutsü shim saka shiranger anepalutsü memetet aser mozüa mezülutsütetter ta süra shirnok akoksatsü ? Sepai asütsü shim saka asema moutetter ta süra shirnok akoksatsü ? Iba amaji sorkar mapa tapu balala nung inyaktsü nisungbo aika shima lir saka mapa meteterbo mali ta asüba tensa tia ka nung Nagaland shirangdaktsür. Aji oda, Nagaland nungbo sorkar mapai aitsü atema tatidang agir temsüa alir nübo tajung shimer masü saka tatidang magi dang kar kinunger asüba agi, kar party pur asüba agi aser karibo sen aser ali agütsüba agi shimba purtem asünungji, parnokji mapa inyaktsü shimba masü saka ita sen chia alitsü atema sorkar mapa nung shimba lir, anungji, item jagi mapa inyak mashi aser makokyonga mesüra mapai maruyonga kecha tesüngmangtsü mali. Item jagi mapai maruba dang masü saka mapa meinyaki sorkar sen miimzüka agitsü merangtsü, kechiyong parnok mapaji sen agi ali. Iba temenen jagi tanü Nagaland kangshir. Aji oda, sorkar mapai aibaji jungjunga zünger nübortem tenzüktsü aser pei lima asoshi temelenshi tajung ka bener arutsütsü temulungtetba nung aier masü, saka kecha mashi memetetyonga ayongayong sen agi sen melentsü asoshi aier. Iba jagi teinyaktetterbo melamelaa takar akümer. Iba amaji tanü kar melamelaa takar akümdang nübortembo timtatemba aser tesensakba tiai idaktsür. Tanü asen lima nung  temelenshi nüngdakba tesemji ibaji ka asütsü. Sorkar mapai aiba ya ita sen achitsü aier masü saka nübortem tenzüktsü aier ta tangatetba kati arutsüla. Ibaji dang masü saka sorkar mapai aiba ya pei kija agitsü rongsen bendentsü aier masü saka nübortem asoshi rongsen angudak lenmang bushia lapoktsütsü aier ta angateta inyak tenzüktsüla. Atangji, tatidang agiyonga nisungi dang agir asünungji tejak repranga yaritepba aser ochimashi inyaktsüsa lenmanga alitsüa akok. Ajisüaka, tatidang agir shimbatetka mali aser teshimertem asoshia ibaji aküm aser mera asütsü. Aji oda, tanü asüng balaka NPSC ajanga agiba tatidang nung takok angurtem ya temsüa aliba agi shimtetogo ta asütsüsa parnok mapa agi kuli asür. Tanü Nagaland nung nübortem asoshi rongsen lenmang bushitsür mali pei agitsü sen bushirtem  agi tasüng kümogo. Ibayongji, nisung ishika ket nung dang rongsen ajak oadokogo. Tanü asenoki nübor tenzükertem jenjang reprangdangra, alua parnoksa tuluba, kiojena parnoksa teimba aser senotsüa parnok ket nungsa teimba aliba takar telok ka angutsü. Item akaba jagi nübortem maka aser nübortem makaba agi lokti aser yimten tebilemtsü manener. Tanü asen lima aser loktliba nung temelenshi nüngdaka jembibaji iba ama tensa tiaji melenshitsü nüngdakba indang jembir. Nisung kar takar akümbaji junger aser takarba takarba akümtsü merangtsüla saka parnok akaba agi nübortem tesensakba makümtsüla. Kar takar akümba agi nübortem lenmang tamajung nung timtema mejajadaktsütsüla, kar akaba agi tanurtem school fee-a magütsütettsüsa mesensakdaktsütsüla, kar akaba agi nübortem mozü kidang taneptsü mangutsüsa masütsüla. Item ajakji yimsüsür, ketdangser aser tenzükertem shimdang aibelena shimba ajanga adoker. Alima jungdi süra aser nübortem yimjiyimjung nung lidi süra, item aibelenji asenoki tangsa tang metongshitettsüla aser tangsa tang temelenshi bener arutettsüla.