Tatitangba sülen tatitang (Lipok 3:1-13)

“Shibai tatitang aremzüker pa temoatsüba” (Yakob 1:12).
Tatitangji temenen masü saka tatitangbai kokdaktsübaji temenen. Aseni tamakok angudang asenoki tangar tenüng asener mesüra langka dak atonger. Adami aser Yisui tatitangba den koda ajurutep, bushiba nungi asenok nem tangazüktsü lesson aika agütsür.
Tatitangba kwika
Yisui tatitang aika koktet. Laishiba nung (Mt.4) tatitang asem dang zülua liaka, tatitangba mapang tajung ka mangu tashi dang Pa nungi pila (Lk.4:13). Yisui tatitangba nem kodanga mekokdaktsü, Satani ain adoka pa tasa balala melenshia atidang. Laishiba nung ashir, pa ajak nung atidang. Yisui tatidangba aika koktet, Adam-bo mezüngbuba tatitang nung tsükadok.
Aikati ashir, tatitangba ka sülen ka aru nung ni kodaser noktangtettsü ? Yobi iba telangzüba agütsür. Osang abener kati pa dang par kilir ajak Sabean nungeri tepsetogo ta osang bener aru. Pa tejembidak nung, tanabuba osang abener kati Tsüngrem nungi mi yoka par san ajak rongsetogo ta ashi. Pa tejembidak nung ano Kaldea nungeri pa ut ajak bener ogo ta aru. Pa tejembidak nung par chir ajak asüba osang bener aru. Asenok kar iba ama atidanga lir asü? “Item ajak nung Yobi temenen memena!” (Yob 1:13-22). Tatitangba kechai temenen kecha memetentsür.
Asenok kong lir?
Tsüngremi Adam Eden tsüki nung yutsüba ama Tanela Temeshii Yisu aremi anir ao (Mt.4:1; Lipok 2:15). Yisui koktet, saka Adami makok. Yimya mesüra tia dak tongtsütsü makok.
Yosef adianui pa yokaka, Tsüngremi pa Ejipi yok (Lipok 45:4-5). Ejipji taküm asüngtetta maliba lima liasü. Ejip nunger nisung ka kinüngtsü agitsü asoshi nisungbaji tepsettsü matidaki liasü (Lipok 12:12). Taküm libaliro ajaklen teraksa liasü. Potiphar kinüngtsü Yosef mesüzüktsü merang (Lipok 39:5-7). Iba tia nung Yosefi temenen dang “ma” ta ashi! Na kong lidir liang, Tsüngremi yutsü, ne tamakok asoshi atemzüktsü kuli mali.
Kibuba Yisu, Nai tatitang akokba ama nia koktettsüsa na kü tsütsü teti dena liangma. Amen.