Tatitangba Takok (Yob 6:1-24)

“Kü dang sayuang, ni mokorai lidi, aser ni kong aibelener aji angatetdakjang.” (Yob 6:24).
Ajak tesüngjem nung alidang temeli azüoka asenok alitsü temela, aser iba nung balaka merangtsü menüngdak. Saka kodang asenok süngjema melilir aser ain adokdir, asenoki mejembitsütema jembir. Yob pa taküm timtem shisabulu nung liaka pai kanga kümdanga jembi. Yobi kanga ajemalua pa aibelenba melenshitsü mulunga liasü.
Asenok timtem nung Tsüngrem pelaa mali. Asenok temenen nisungia asen chirtem pelaa toktsünera, asen kotaker Tebui Pa chirtem koda tali pelaa metoktsünütsü? Saka timtemji Pa lemangtem sayutsü aser metongshitsütsü makokba süra, kotaker Tebui metongshitsüba ajakji asenok nungi agiener asenok taküm raksatsütsü asü?
Tenüngsang Ken zülur taküm kuliji ainkartem, tebutitem parnok putu nung Tsüngrem den jaja ama jajaba taküm kuli lir. Pai Tsüngrem dang nangzük, “Ni timtem agi metongi alidang, ni aibelena ao; saka tangbo ni Ne o benshir. Ne telatet ozüngtem ni angazüktsüsa ni timtemdaktsübaji ni atema tajung lir” (T.Ken 119:67,71). Asen dangi timtem mapang arudang asen tebang nungi iba ama O matoktsü südi. Saka asenoki süia aruba timtemtem bilemtetra asenoki aremzüka atatsü, mejungi mebilemtsü. Ibri shiti züluri item tatem maka mapang O asenok asoshi zülu: “Temerenshi ajak atongba mapang nung tepelatsü masü, saka tejashitsü mesüker, aji saka tesülen, shiri aji agi azüokba arur parnok asoshi temeshiba tesünep tejang tangtsür” (Ibri 12:11).
Asenoki inyakyim balaka bushiteta mapang tatsüba nung mapa inyakteta lia aor. Saka Tsüngrem asoshi, Pa kodanga memelenshir aser Pa aritepa mali. Mapangtem Pa ket nung lir. Taküm lesson manger mesangwa dang mangazüker. Taremzük aser tatasabaji zütoktsü makok. Akhi temeshi nisungi timtemji shisaliokdak ka ta ashibaji tesüngmangtsü mali.
John Chrysostom (350-407) Khristan sayutsüngir rongnung tulutiba ta meteta liasü. Pai ashi, “Nübutsüi na maginer, ne chirtem asoshi na shisabulur, ne tsükchirtemi ne sülen mapa inyaker … na sensak tia nung timatemer, na anasatiba aser temeimtiba samatok… ne zübu asoshi totzü kong nungi nai angutsü? Laishiba nungi dang.”
Ne O nungi kü mulung tesünep bushitettsü tangatetba shisatsü kü nem moajang, Oba.
Amen.