Tatsü saka tarok (T. Ken 117:1-2)

Tenüngsang Ken 117 ji tatsütiba ken lir- tekong ana dang lir. “O Kibuba sangang, nenok bendangertem ajak; nisung ajaki Pa ayima sangang. Kechiyong asen tsütsü Pa yimlibilem tulu lir; aser Kibuba atangjibaji teti tatem maka lir. Nenoki Kibuba sangang!” Ibai tatsü saka tarok lir.
Tangari asenok dang kechi inyak ibaji kecha timtem melii asenoki bushiteter. Kari asenok asoshi inyaktsüba nung asenoki kanga pelar ta ashir. Saka kkenkhen asenoki Kibubai asenok asoshi inyakba nung, talisa mapa tila nung Pa dang kanga pelar ta ashitsü mebilemtetter. Tenüki ngudaktsüba, tenarongi angashidaktsüba atema asenoki Pa tenüng asanger asü masü? Pa temoatsütem metetta Pa tenüng sangang.
Ken züluri ashir, “Nisung ajaki, Pa ayima sangang.” Saka iba lima nisung billion aikati Pa tenüng masanger kechiaser parnoki Pa memetet. Parnoki kodanga Yisuji alima Kümtetdakba ta mashir. Tia maka, Khristan aikati iba indang mebilemer. Kin ajaki mamangra koda sür kin ajaki Pa tenüng asangtsü ?
Kibuba sangang kechiyong Pa yimlibilem taochi aser ochiba teti alir. Aser nai shiba tenüng asanger Pa indang ajak dang ashitsü merangang.
Tsüngrem tenüng asangtsü asoshi Pai ne nem moatsüba kar bilemdangang. Pa temoatsü teti asoshi agütsü ta bilemtsü temela aser Pai moatsübatem mengui toktsür. Nai tenüng sangaka, Pa tenüng masangba aika lir. Tanü Khristaji Kümtetdakba lir ta memeteter ka dang ashitsü Kibuba dang asüngdangang.