Tatsübaleni tatidangdaktsü

Idangji Abisahai Dawid dang ashi, “Tanü Tsüngremi ne tsükchir ne ket nung bendanga agütsüogo: Anungji tang ni ne dang mepishir, Nü jagi ali nung tsüngloka ni pa dak ken dang tsüngdi aser ni tanabenbo pa dak matsüngtsü. 1 Samuel 26:8.
Ne taküm alizüng nung ken ken tatsüba leni aotsü na atitangtsü akok. Dawid aiben tatsübaleni aotsü atitang aser tatem nung pai chuba menden agi. Ainkar Samueli Dawid chuba asütsü ta totzü mezüja shimtet (1 Samuel 16:12-13). Pai Tsüngremer mapang ataa alidang, Saul chuba yimli nung lendong bener aruba pai ngua liasü. Sauli Dawid tepsettsü merang, pa jena aotsüsa aküm.
Dawid jenshia aliba mapang, pa dangi mapang tajung ka aru. Dawidi Saul teimla makaba jenjang ka nung angu, pa army den mejanger liasü. Abisahi Saul tepsettsü Dawid dang asüngdang. Ibai abensaa angatettsüba mapang ka liasü. Sauli aiben Dawid tepsettsü merang. Dawid chuba süidaktsütsü ni bilemer ta Tsüngremi ashi. Pai mapangji pa teka nung agir, pa jenshia aliba mapangji tatembang kati arua Tsüngremi mezüja shimtetba chuba ka ama chuba menden nung amentsü mapang aru. Saka pai chuba mendenji aginüa aser aji agitsü pa temeten lir ta metetta liaka pai Saul dang tsüngchir süa aliba meindoknü. Pai Saul chuba tepsettsü memela. Tsüngremi tuyuba lenmang nung mesüra tanga lenmang nungi pai mulungba ataloktsütsübaji tamakoktsü.
Ne dangi kasa tatitangji arutsüa akok. Ne tembar tajungi ataa meli-i yakta Tsüngremi mulungbaji ataloktsütsü ajungshitsü akok. Tatembang jagi tetenzükbaji melentsütsü ta bilema nai tia mapangji dang azüoktsü merangtsü akok. Tsüngremi atatsüba mapangji iba mapang ya lir.
Tsüngremi na jenjang ka tongtsütsü renemtsütsü akok, mesüra tanga lemang ka tuyutsü akok, saka mapangji ano matong asütsü akok. Ne mulungjang mita liang. Tsüngremi mulungba nung aotsü tangar ajanga ne tsüngchiba teraksadaktsü.