Tayimtsü abenba jahaz Taiwan tsütsüi aru

Taipei, Metsüremi 21 (Agencies) : Taiwan Strait adena China nunger indang tayimtsü abenba jahaz senzüba ajanga ibaji tsüngsü nepa aotsü asoshi parnokia jet aser jahaztem yokogo, ta tanü Rasemnü Taiwan-i metetdaktsüogo. Iba maparen jagi asetkong nung aliba nüburtem nem Beijing leniri tekümdangtsü osang sangoktsür.
China lima sadangtsütsü merangertem amokmerena China Tir, Xi Jinping-i linük ayongzüka jembiba kasa anogo nung Liaoning aser tanga jahaz kar Taiwan nunger tsütsü jagi yashi Sangtennü tonga aru.
“Linük sadangtsütsü merangba tasa aser inyakyim ajak nung tamakok angutsü aser ibaji nüburtemi aitsütsü aserbo otsü (history) agi merenshitsü,” ta National People’s Congress pur kümshi agiba senden tembanga jembidang Xi-i ashi.
2016 küm May ita nung Tir ka ama Tsai Ing-wen-i linük yimsü asütsü maongka anguba sülen China nungeri asetkong tsütsüi tayimtsü aser jahaztem mapang shia yoker.
China-ibo Taiwan ya par lushi ama agizüker saka Taiwan ya parnok kijai dang yimten benner.
Taiwan defence ministry ajanga ashiba agi, China nunger indang tayimtsü abenba jahaz-ji ibai dang lir aser iba tenüngji Liaoning ta agüja lir.