Tayimtsü agi sentaktepba ajanga NE tashi aittsü : Assam CM

Dispur, August 25 (Agencies) : Brihostibarnü Assam Chief Minister Sarbananda Sonowal-i, “Tayimtsü maneni jajaba ajanga northeast tesema linük tesem ajak den sentaktepa küma rongsen kettsüng nung terenlok adoktsü,” ta ashi.
Pai iba o ya October 4, 2016 nü nungi tenzüka anogoshi Spice Jet tayimtsü Silchar, Kolkata, Guwahati aser ano Guwahati o Aizawl yimtitem den sentaktepa ayimtsü lemtetba sülen ashi.
“Northeast aser linük tesem balala tayimtsü ajanga sentaktepba ajanga Assam aser anünga aliba northeast state tem tourism tsütsü tali renloktsü,” ta Spice Jet dang pelaba lemsatepba mapang Sonowal-i shisem.
Iba terenlok tulu atema pelaba metetdaktsüdang Minister of State for Civil Aviation, Jayant Sinha-i, “Feeder routes tem kija agia yimti tilatem nung aliba nüburtem sentaktepa kümdaktsür. Iba den külemi Civil Aviation inyakyim tasen agi region balala sentaktepa kümdaktsütsü,” ta ashi.
Barak tenemtsüngi oli aruli jajatsü kanga tasak, ajisüaka tayimtsü jajaba renloka akümba sülen nüburtem, talisa shisashirtem aser manemertem kecha tetsükdaktsü makai senzütettsü.
“Tesem nung tayimtsü jajaba tsütsü terenlok adokba ajanga northeast rongsen kettsüng tali tashi aittsü,” ta ashidang Sonowal-i, ano tanga tayimtsütemia Assam aser anünga aliba northeast state tem nung tali renloka yimdaktsütsüla, ta shisem.