Tayimtsü kol raksa; ajungbena Philadelphia nung anen

Philadelphia, Rongchii 18 (Agencies) : Southwest Airlines tayimtsü ka New York yimti nungi Dallas-i oyaa aliba mapang kol nung timtem adoka nisung ka asü saka tayimtsüji metsükokdaktsüi Philadelphia International Airport nung ajungbena anentetogo, ta osang ka ajanga metetdaktsü.
Boeing 737-700 tayimtsüji yimketa tur mapang tatsüka tsüngda passengertemi kol abelen tsütsü apokba ola ka angashi; ibaji poksadang nisung ka asü aser ano tangar ka tera agi dang raksar aliba kichiba tapok tema jagi atsüteta bener mao. Ano kol poksadangji passenger kar tera yiru.
US Navy nung mezüngpur tetsür fighter pilot inyakla, arishi küm 56 tain Tammie Jo Shults-i iba tayimtsü anir oyaa lia anüng tom nung iba lendong atalok saka lai süngjem-süngjema dang lai aniba tayimtsü nung shilem ka raksaogo, ta air traffic control den jembidang ashi aser tayimtsü anendak ambulance renema lidaktsüner ta metetdaktsü.
“Tayimtsü nung shilem ka raksaogo anungji onok tera tanemi aotsü,” ta tayimtsü anendak aliba controller den jembidang Shults-i metetdaktsü.
“Timtemertem yaritsü purtem renema lidaktsüner kechiaser passenger kar yirua lir,” ta lai tayimtsü nungi osang yok.
“Tayimtsü nung mi adoka lir asü?” ta air traffic control ajanga asüngdang.
“Masü, mibo adoka mali saka tayimtsü shilem kar samaogo. Tayimtsü nung tapok ka lir aser nisung kabo süchia ogo,” ta tayimtsü anilai langzü.
Philadelphia International Airport nung tayimtsüji ajungbena anenba sülen passenger 144 rongungi aikati social media ajanga la nem tenüngsang agütsü.
“Tammy Jo-i kanga tesüngmangtsüka inyaktetogo! Lai timtem kecha matalokdaktsüi Philly tayimtsü anendak luagi anen,” ta Instagram nung Amanda Bourman-i züluja lir.
“Southwest Airlines nung inyaker ajak kanga dang jashir aser iba lendong nung timtem ajurur ajak den temulungjang taroktiba agi sasa bilemba lemsateper,” ta tayimtsü company-i metetdaktsüogo.