Tayimtsü nung senzürtem indang osangtsüsang lemsateptsü: EU

Brussels, April 14 (Agencies): European Union (EU) lenirtemi Belgium yimtiba, Brussels nung senden ka mena EU nung züngsemba linüktem rong nung tayimtsü nung senzüsenpongertem indang osangtsüsang lemsateptsü telemtetba ka tanü, Brehostibar nü agiogo.
Syria aser Iraq na densema, tensa mejungi aliba tesemtem semdanger aser item tesemtem nungi meyipa arurtem indang osangtsüsang agitsü nükjidong nung EU lenirtemi tanü iba telemtetbaji agir lir.
Nübur temeten anema meinyaktsü aser tensa azüoktsü onük mapang talangka atsütepa jembiba sülen EU lenirtemi par vote agüja Passenger Name Record ozünga France kübok Strasbourg nung lateta liasü.
Tan telemtetba agiba sülen EU nung züngsemba linüktem semdanger mesüra kasaji toktsürtem indang osang lemsateptsü aser osangji ita 6 tashi ayutsü renemogo.
“Tan agiba telemtetba ya kiralongrar anema raratsüren nung tongti mera ka agir lir,” ta EEP Christian Democrat telok nungi parliament züngsem, Ivo Belet-ia metetdaktsüogo.
Tanü tashi nung Europe nunger ishiba agi nisung 5,000 shi tongpang raratsü terenemshiba agiba mesüra Iraq o Syria na nung IS tenüng nung tongpang raraba osang angazüka lir saka Europe linüktemi parnok senzüsenpongbaren den sentakba osangtsüsang tejangja monguteti lir.
EU-i US, Canada aser Australia nunger dena tayimtsü nung senzüsenponger indang osangtsüsang lemsateptsü tezüngzüktep agia lir.