Tayimtsü raksa tanabujia MH370 indang ta bilemer

Paris, August 02 (Agencies): Malaysia Airlines MH370 meyong ta temulung melemi bilemba, tayimtsü raksaba shilem tanabuba ya Indian Ocean nung aliba Reunion asetkong nungsa Deobar nü angu, ta media ajanga metetdaktsü.
Tan anguba tayimtsü raksaba shilem nung ya China oshi mesükba ojang kar zülua lir aser iba ya tayimtsü kishi shilem ka mesüka lir. Iba shilem ya asetkong nung yimtiba Saint Denis nung oli-orar kari angu, ta The Guardian osang ajanga ashi.
Nisung kati phone ajanga merang oset tuluka ngua lir aser iba nungji memetetba oshi kar zülua lir ta ketdangsertem dang ashiba sülen iba osang ya mezüng Freedom Radio station nungi sangdonga liasü.
July 29 nü mezüng tayimtsü tashikang mesükba, tayimtsü raksaba shilem ka anguba sülen tan ya tanabuba angur aser iba shilem ya Saint Andre nungi kilometre 25 pilar angu. Tan anguba tayimtsü raksaba shilem yaa bushisüngdangtsü asoshi France-i yokogo.
Mezüng anguba tayimtsü raksaba shilem jungjunga asadanga bushisüngdangba sülen MH370, Boeing 777 meyong lir, ta jangjaogo.
“Mezüng anguba tayimtsü tashikang mesükba osetji Boeing 777 tayimtsü meyong lir ta onoki official süa jangjatepogo. Iba bushisüngdang aser asadangba mapa ya France ketdangsertem, iba tayimtsü yanglurtem, US National Transportation Safety Board, Malaysia Airlines, MH370 atema Malaysian ICAO annex 13 safety investigation team aser Malaysia nungi department of civil aviation telok ka dena inyakba lir,” ta Malaysia Transport Minister Liow Tiong Lai-i ashi.
March 8, 2014 nü iba tayimtsü nung asür parnok 239 bilemteta Saint Andre tenla kidang Honibar nü sentep sentong ka agia liasü.
Iba tenla ki ya mezüng tayimtsü raksaba shilem anguba tzüküm anasa lir aser iba sentong nung nisung 400 dak tema dena liasü.