Tayimtsü raksaji MH370 meyong ta tamang akar: Australia

July 31, 2015: Saint-Andre, Reunion asetkong nung police temi tayimtsü raksaba shilem ka bener aoba yashi tangokba noksa nung angur. Air safety bushisüngdangertemi ashiba agi iba tayimtsü raksa shilem ka ya Boeing 777 meyong tashikang shilem lir. Iba noksa ya July 29, 2015 nü tangokba lir.

 Sydney, July 31 (Agencies): Malaysia Airlines flight MH370 bushiba nung ketdangsertemi Hokolbar nü Indian Ocean nung aliba asetkong ka nung tayimtsü raksaba shilem ka angubaji MH370 indang lir ta kanga tamang akar aser iba ya ajanga tayimtsü samaba kuli menguteti aliba angateta arutsü.

Parnoki anguba tayimtsü raksaba shilem tila ka tasazükji metre ana (feet 6) lir aser ibaji France-i bushisüngdangtsü atema bener yoktsü aser iba mapang tayimtsüji Indian ocean nung tsüok, ta jangjatsü parnok teimla tulu lir.

Iba oset ngutetba ajanga ita 16 tejaklen nisung 239 mener memetetba tesem nung samaba tayimtsü, Malaysia Airlines Boeing 777, MH370 ya koma aser kong sama mesüra tsüok, ibaji bushisüngdangertemi angatettsü anasai arudar.

“Iba tayimtsü raksaba shilem ya MH370 meyong lir ta onoki kangasa tamang akar, iba ya 777 tayimtsü nung aliba shilem kangasa mesüka lir,” ta MH370 bushiba nung lenir aser Australia Transport Safety Bureau nung chief commissioner Martin Dolan-i AFP osangbenertem dang ashi.

Malaysia Ato Kilonser Najib Razak-i ashiba agi, tang ngua aliba ya Boeing 777 meyong mesüka lir saka tamasa jangjatsü nüngdaker.

Dolan-i ashiba agi, ghonda 24 tsüngda nungbo osang tejangja kabosa angashitsü.

Mongin aikati iba oset ya Boeing 777 meyong tashikang shilem amai bilemer aser parnoki bilembaji shitak asünungbo, samar bushitepba Malaysia tayimtsü meyong asütsü aser ibaji ajanga talangka mangateti aliba otsü ka angatettsü.

Yaküm March ita nung MH370 tsüok, ta mulung malem bilemba tesem, France asetkong, La Reunion nung iba tayimtsü raksaba shilem tila ka ya nguteta lir.

Australia transport & infrastructure minister Warren Truss-i ashiba agi, iba tayimstü ya tesem shitak nung bushidar aser tang ngua alibaji MH370 meyong lir, ta kanga tamang akar.

National Oceanography Centre, Britain nung scientist Valborg Byfield-i, tzüyim nungi current ana adoker aser item jagi iba tayimtsü raksaba shilem kaji tsüokba tesem nungi La Reunion tashi nungtsür aru südi, ta ashi.

MH370 ya March 8, 2014 nü Kuala Lumpur nungi Beijing aoba mapang sama aser tang tashi nung komaser mesüra kong sama’ar meputetter.

Iba tayimtsü raksaba shilem den külemi ano süngden teraksa tila ka nguteta lir.