Tayimtsü tsükokbaji kiralongrar mapa asütsü akok: Fathy

Cairo, May 19 (Agencies): France yimtiba, Paris nungi Egypt yimtiba, Cairo bushia aoba tayimtsü ka tanep, Brehostibar anepdang Mediterranean Sea nung tsükokba osang jangjaogo.
Nisung 66 aniba tayimtsüji tsükokba sülen Greece kübok Karpathos asetkong anasa tzüyim nung police, mitkar aser rescue ketdangsertemi tayimtsüji bushitsü tenzüka liasü.
Tanü anogo tum nung tashi Egypt indang tayimtsü kati temeremso sentsü aketba oset ana tashi Greece kübok Crete asetkong nungi south-southeast tsütsüleni mile 230 shi pilar tzüyim nung anguba osang ka metetdaktsü saka tang tashi item osetji tsükokba tayimtsü indang shilem asü masü iba osang mejangjateti lir.
Tan tsükokba AirBus 320 tayimtsüi Paris kübok tentetba Charles de Gaulle Airport yasüng 11:09 ako meta toktsü aser tanep 3:15 ako meta Cairo tonga aotsü liasü.
Tanü tayimtsü tsükokbaji technical timtem adokba ajanga masü saka kiralongrar mapa asütsü akok ta Egypt Aviation Minister, Sherif Fathy-ia metetadaktsüogo.
“Kechi timtem ajanga tanep tayimtsüji tsükok iba osang tang tashi mejangjateti lir saka tayimtsü tsükokbaji kiralongrar mapa asütsü akok,” ta Fathy-i metetdaktsü.
“Flight 804, AirBus 320 tayimtsüi tila tanur 1, kinü tanur 2, tayimtsü police 3 aser tayimtsü ketdangser 7 densema, ajak agi nisung 66 anir liasü aser tayimtsüi anir alir rong nung France senso 15, Egypt senso 30, Britain senso 1, Iraq senso 2, Kuwait senso 1, Saudi Arabia senso 1, Sudan senso 1, Chad senso 1, Portugal senso 1, Algeria senso 1 aser Canada senso 1 aniba osang tang tashi nung jangjaogo,” ta Fathy-i metetdaktsü.
“Tanü tayimtsü tsükokbaji kiralongrar mapa asütsü akok,” ta shia, Russia’er security agency lenisang, Alexander Bortnikov-ia Egypt den aroki lungjemer tan lendong atalokdaktsür pua parnok ozüngi melaba ama merenshitsü renemba osang ka metetdaktsüogo.
“Tanep tayimtsüji kechi timtem ajura tsükok iba osang mejangjateti lir saka tayimtsü tsükokji kiralongrar mapa asütsü akok,” ta Egypt Ato Kilonser, Sherif Ismail-ia Cairo tayimtsü anendak osangbener den ajurutepdang metetdaktsü.
Tan tayimtsü tsükokba sülen, US Navy, Greek Navy aser France mitkartemi ketdang asüba tayimtsütem yoka tayimtsü tsükokdak tayimtsüji bushiba osang angazükogo.
France Tir, Francois Hollande aser Egypt Tir, Abdel-Fattah el-Sissi natia tanep telephone ajanga tongtepratepa, par linük anati aroki lungjemer tan tayimtsü tsükokba lendong bushisüngdangtsü bangjemba osang jangjaogo.