Tayimtsü tsükokdaktsür nem tapet telangzüba agütsütsü: Putin

Moscow, November 17 (Agencies): Egypt lushi nung Russia tayimtsü tsükokdaktsür nem tapet telangzüba agütsütsü renemba osang ka Russia Tir, Vladimir Putin-i tanü amokmerenogo.

Tayimtsü nung bomb yutsür kasaji pokdaktsüba ajanga Russia’er tayimtsü Egypt lushi nung taoba October ita poksa tsükok ta Kremlin-i osang bushitetba sülen Putin-i tanü iba amokmerenba osangji sangoktsü.

Kasa lendong nung ishiba agi nisung 224 shi asüba osang bushiteta lir.

“Ozü tayimtsü tsükokdakja lendong atalokdaktsür ajunga arishia aputsü aser parnok nem ozüngi melaba ama tapet temerenshi agütsütsü,” ta shia, tan lendong atalokdaktsür aputsüsa osang tejangja agütsürtem nem senpet sena dollar sen million 50 tashi agütsütsü renemba osang ka Putin-i metetdaktsü.

“Taoba October ita 31 nü tayimtsü tsükokdaktsüji kiralongrartem mapa,” ta West linüktemi osang benoka liasü saka bushisüngdang tembanga agiba sülen ang osang tejangja metettsü ta Russia-i metetdakja liasü.

Ajisüaka, Egypt nung tsükokba tayimtsü shilem aser tayimtsüi aniba nisungtem indang osettsüset nung pokshiba oset shilem kar densema aliba kuli bushitetba osang ka Russia sorkar kübok tentetba Federal Security Service (FSB) lenisang, Alexander Bortnikov-i yasüng, Hombar aonung benoka liasü.

“Tayimtsü nung TNT pokshitsü oset seret 1 shi taret yutsür kasaji pokdaktsüba ajanga tayimtsüji anüng tom nung poksadakja Egypt nung tsükokba kuli tejangja nguogo. Iba osang bushitetba ajanga kiralongrartemi tayimtsü lendongji atalokdaktsü ta kuli tejangja angur,” ta pai metetdaktsü.

Ano külen, Russia tayimtsü tsükokba ken o nung ajemdaker temulung melemi bilemba Egypt kübok Sharm al-Sheikh tayimtsü anendak mapa inyaker nisung 2 tashi Egypt-i apuba osang ka sorkar ketdangsertemi metetdaktsüogo.

Metrojet teloki ketdang asüba Airbus A321 tayimtsüi Sharm al-Sheikh tayimtsü anendak toktsür Russia kübok St. Petersburg yimti bushia ao tenzükdang kasaji Sinai Peninsula temalen anüng tom nung poksa aser ali nung tsükokba osang jangjaogo.