Tayimtsü yoka Syria nung tentetba IS telok mitsü: Hollande

Paris, September 07 (Agencies): France linüki par itangitsü tayimtsü yoka Syria nung tentetba Islamic State (IS) kiralongrar telok mitsü sentong renemba osang ka France Tir, Francois Hollande-i tanü Hombar nü metetdaktsüogo.

Tang IS anema teraradak US-i aniba alima teloktep mitkar telok nung densema France-ia IS anema Syria nunga raratsü renemba osanga angazükogo.

France-i par mitkar tayitmsü yoka Iraq nung tentetba IS anema tang teraradak lir saka Syria nung tentetba IS anema raratsü tenzükba sülen US sülenbo IS anema raraba West linük tanabuba akümtsü.

“Asüng, Mongolbar nü nungi tenzüka Syria nung tentetba IS telok mita par tesep tentetdak tesem ajunga meteta akümtü asoshi itangitsü tayimtsü Syria temalen anüng nung yimzüdaktsütsü atema ni ozü Defense Ministry dang asüngdangogo,” ta Hollande-i metetdaktsü.

Ajisüaka, par mitkartem Syria-i tsüngdong yoka tongpang raradaktsütsü sentongbo renema mali ta pai ashi.

France-i US nungi alizükba F-16 jet tayimtsü amshia Iraq nung tentetba IS telok anema amakba maparen 15 tashi inyakba osang ka Iraq mitkartemia metetdaktsüogo.

Ano külen, Germany, Russia aser Ukraine lenirtem den aroki senden ka mena Ukraine den sentakba ken o benoka jembitsü onük ka Hollande-i tanü metetdaktsüogo.

Iba sendenji Paris nung United Nations General Assembly senden tan September ita tatembanglen amenba jakdang amentsü akok ta pai ashi.

West linüktemi ayongba sülen Ukraine sorkar aser sorkar anemer na tsüngda taküm February ita yimjung tezüngzüktep agi saka Ukraine nung anogoshi lendong atalokba osang bushiteta lir.

“Ukraine nungi sadanga Russia pusemba state ana nung election agitsü aser par lenirtem nem yimsütsü tashi tuluba agütsütsü den sentakba maparen inyaktsü nungdaka lir,” ta Hollande-i metetdaktsü.

Item maparen takok ngua inyaktetra, European Union (EU) aser US nati Ukraine sorkar anemer pusemba ken o nung ajemdaker Russia anema benokba tenokdangba sentongtem agientsü asoshi onük benoktsü renemba olen ka paisa shisem.