Taylor Swift-i cancer agi shiranger ka nem US sen 50,000 agütsü

July 08, 2015: Pop kentener nüngtugu Taylor Swift-i Leukemia cancer agi shiranger arishi küm 11 tetsür chanu ka temang anepalutsü asoshi US sen 50,000 (Pound 31,300) tenla agütsüogo.

‘Shake it Off’ ken atenla Taylor-i temeim agi tenla tulu agütsüba ajanga Naomi Oakes’er kibong kanga aoksaogo. Tanütsülar kibong jagi myelogenous leukaemia shirangba nung intokba sen agütsütsü asoshi crowdfunding page ka lapoka liasü.

Naomi ji August ita Phoenix, Arizona nung Swift kenten sentong reprangtsü sentong liasü, saka taoba ita la dak iba tashitak putetba ajanga lai iba kenten sentong mereprangtettsüsa kümogo.

Item osangji angashiba sülen Swift-i lar kibongi nüngdaka aliba sen ajunga (US $50,000) ji agütsü aser GoFundMe.com page ajanga lai, “Iba ya tobur tajung aser tasütait Naomi atema lir, nai iba (kenten sentong) ya mereprangtettsü ta angashia sasa bilemtsür, saka ano kenten sentong aika lir. Na komaser taneptsü angutsü, ibaji dang bilemdi. Ni na aser ner kibong dangi salem abener,” ta ashi.

Tesülen Naomi’er kibongi, “Taylor Swift-i tenla agütsüba ajanga Naomi kanga aoksaogo. Kanga pelar Taylor Swift. Na kanga temeim aketba nisung ka lir aser ozü kibongi temulungjang taroktiba nungi nü dang pelar,” ta ashi.